Tadbirda talaba yoshlar va mehmonlar oʻzbek tilining milliy oʻzligimiz va madaniy merosimizdagi ahamiyatini his etishdi
2024-yil 21-oktyabr kuni Toshkent Kimyo xalqaro universitetining “Boshlangʻich taʼlim” yoʻnalishi 2-kurs talabalari ishtirokida “Milliy qadriyatlar sayli” haftaligi doirasida Oʻzbek tiliga davlat tili maqomi berilganligining 35-yilligiga bagʻishlab “Til — millat gʻururi va faxri” nomli madaniy-maʼrifiy tadbir boʻlib oʻtdi. Tadbirda talaba yoshlar va mehmonlar oʻzbek tilining milliy oʻzligimiz va madaniy merosimizdagi ahamiyatini his etishdi.
Tadbir davomida oʻzbek tilini sharaflovchi sheʼr va qoʻshiqlar kuylanib, sahna koʻrinishlari namoyish etildi. Koʻrsatuvlar orqali oʻzbek tilidan faxrlanish, uni yoshlar oʻrtasida qadrlash va eʼzozlash gʻoyalari chuqur aks etdi. Talabalar ona tilimizning boyligi va goʻzalligi haqida oʻz nutqlarini bayon etib, milliy qadriyatlarimizni saqlash va rivojlantirishda tilning oʻrni haqida mulohazalar bildirishdi.
Bu tadbir, ayniqsa, yosh avlod orasida milliy tilimizga boʻlgan hurmat va ehtiromni yanada kuchaytirishga xizmat qildi. Mehmonlar va talabalar tomonidan katta qiziqish va eʼtibor bilan kuzatilgan ushbu tadbir barchada unutilmas taassurot qoldirdi. Oʻzbek tilining davlat tili maqomi berilganligining 35-yilligiga bagʻishlangan mazkur madaniy-maʼrifiy tadbir nafaqat milliy tilimizning ahamiyatini yoritdi, balki uning kelajak avlodlar uchun ham naqadar muhim ekanligini yana bir bor koʻrsatdi.
