2024 yilning 11 avgust kuni Toshkent Kimyo xalqaro universiteti ta’sischisi prof. A.Vaxobov boshchiligidagi delegatsiya Janubiy Koreyaning birinchi xususiy va eng nufuzli universitetlaridan biri Kookmin universitetiga rasmiy tashrif buyurdi
2024 yilning 11 avgust kuni Toshkent Kimyo xalqaro universiteti ta’sischisi prof. A.Vaxobov boshchiligidagi delegatsiya Janubiy Koreyaning birinchi xususiy va eng nufuzli universitetlaridan biri Kookmin universitetiga rasmiy tashrif buyurdi. Kookmin universiteti Janubiy Koreyada “QS World university ranking” reytingida to’rtinchi o’rinda turadi. Biznesni boshqarish, ijtimoiy va gumanitar yo’nalishlarda malakali kadrlar tayyorlaydi.
Tashrif davomida mehmonlarni Kookmin universiteti prezidenti janob Jeong Seung-Ryeol va universitetning ishchi guruhi vakillari samimiy qabul qildi. Tomonlar hamkorlik masalalari bo‘yicha muzokaralar olib bordilar. Uchrashuv davomida ikki oliy ta’lim muassasasi o‘rtasida qo‘shma diplom dasturini amalga oshirish bo‘yicha hamkorlik shartnomasi imzolandi. Bundan tashqari qo‘shma diplom dasturi imkoniyatlari, ikki tomonlama talaba almashinuvi, tadqiqot loyihalari va o‘zaro malaka oshirish dasturlarini tashkil etish kabi masalalar muhokama qilindi. Tomonlar ushbu dasturlarni tez orada amalga `oshirishga oid kelishuvlarga erishdi.
Kookmin universiteti prezidenti Toshkent Kimyo xalqaro universiteti ta’sischisining oliy ta’limiga bo‘lgan yuksak ishtiyoqi va harakatlarini e’tirof etib, uning bu yo‘ldagi sa’y-harakatlarini yuqori baholadi. Janob Jeong Seung-Ryeolning so‘zlariga ko‘ra, ushbu hamkorlik nafaqat ikki universitet o‘rtasidagi ta’lim jarayonini rivojlantirishi, balki Janubiy Koreya va O‘zbekiston o‘rtasidagi madaniy aloqalarni mustahkamlashda ham muhim ahamiyatga ega bo‘lishini ta’kidladi.
Xulosa qilib aytganda, universitetlar o‘rtasida talaba va tadqiqotchilar almashinuvining yanada faollashishi, ilmiy tadqiqotlar sohasida o‘zaro hamkorlik aloqalari kuchayishi kutilmoqda. Bu esa, ikki universitet uchun ham ta’lim berish jarayoni sifatini yanada yuqori pog‘onaga ko‘tarishga xizmat qiladi.
