2025-yilgi Erasmus+ dasturining yangi tanlovi e’lon qilindi
2024-yil 6-dekabr kuni O‘zbekistonda Erasmus+ Milliy axborot kuni bo‘lib o‘tdi va unda 2025-yilgi Erasmus+ dasturining yangi tanlovi e’lon qilindi. Tadbir Toshkent davlat texnika universitetida bo‘lib, Yevropa Ittifoqi va O‘zbekiston o‘rtasidagi hamkorlikning 30 yilligi munosabati bilan tashkil etildi. Unda oliy ta’lim muassasalari vakillari, Yevropa Ittifoqiga a’zo davlatlar elchixonalari, xalqaro tashkilotlar va manfaatdor tomonlar ishtirok etdi.
Tadbir Yevropa Ittifoqining O‘zbekistondagi elchisi Toyvo Klaar, oliy ta’lim, fan va innovatsiyalar vazirining birinchi o‘rinbosari Shahrux Daliyev hamda Toshkent davlat texnika universiteti rektori, akademik Sadriddin Turabjonovning kirish so‘zlari bilan boshlandi.
Axborot kuni quyidagi tadbirlardan iborat edi:
Loyiha yarmarkasi, unda Erasmus+ dasturining muvaffaqiyatli tashabbuslari namoyish etildi.
Erasmus+ 2025 tanlovi haqida ma’lumot, jumladan, CBHE, ICM, Erasmus Mundus, Jean Monnet va Marie Skłodowska-Curie Actions doirasidagi imkoniyatlar.
Yangi arizachilar uchun eng yaxshi amaliyotlar, tarmoq yaratish va tavsiyalar bo‘yicha interaktiv sessiyalar.
Loyiha yarmarkasida Toshkent Kimyo xalqaro universitetining ikki loyihasi – EMPOWER (koordinator Sharipova Zebo Bekmurodovna) va QUARTZ (koordinator Niyozov Farhod Shamilovich) taqdim etildi va faol ishtiroki uchun sertifikatlar bilan taqdirlandi.
Erasmus+ Milliy axborot kuni tashkilotchilari O‘zbekistonning bir qancha universitetlariga Erasmus+ dasturidagi yutuqlari uchun sertifikatlar topshirdilar. Toshkent Kimyo xalqaro universiteti 2021-2027-yillarning Erasmus dasturi ikkinchi davrida O‘zbekistondagi yetakchi sifatida e’tirof etildi va oliy ta’lim hamda xalqaro hamkorlikni rivojlantirish yo‘nalishida 6 ta loyihada ishtirok etgani hamda muhim hissasi uchun sertifikat bilan taqdirlandi.
