Alisher Navoiy hikmatlari jamlangan yangi kitob taqdimoti boʻlib oʻtdi
Toshkent Kimyo xalqaro universitetida buyuk mutafakkir va shoir Alisher Navoiy ijodiga bagʻishlangan yangi kitob – “Sharq durdonalari” (Pearls of the East) toʻplamining taqdimoti boʻlib oʻtdi. Ushbu nashr oʻzida Navoiy hikmatlarining eng sara namunalarini jamlagan boʻlib, u mutolaa sevarlar va ilm-fan ahli uchun muhim manba boʻlib xizmat qiladi.
Mazkur toʻplamda 100 dona hikmatli iboralar jamlangan boʻlib, ular oʻzbek tilida tushunarli izohlar bilan berilgan. Ushbu hikmatlar turk, ingliz va xitoy tillariga tarjima qilingan, bu esa Navoiy merosini keng dunyo kitobxonlariga yetkazish imkonini yaratadi.
Toʻplamning yana bir oʻziga xos jihati – 26 nafar rassom tomonidan maxsus ishlangan noyob illyustratsiyalar bilan boyitilganidir. Har bir hikmat uchun individual tasvir yaratilgan boʻlib, ular kitobning estetik jozibasini oshiradi. Bu sanʼat asarlari “Rang tasvir” yoʻnalishi talabalari tomonidan chizilgan boʻlib, yosh ijodkorlarning isteʼdodini namoyon etuvchi muhim ijodiy loyiha boʻldi.
