Barqaror transport – yashil kelajak sari qadam: Toshkent Kimyo xalqaro universiteti professorlari Italiyaning Turin politexnika universitetida tajriba almashishdi
Toshkent Kimyo xalqaro universitetining “Yoʻl harakati muhandisligi va boshqaruvi” kafedrasi professor-oʻqituvchilari A. Yunusov, S. Roʻzimov, Q. Qutlimuratov va X. Jumaniyazov 3–8 fevral kunlari Italiyaning nufuzli Turin politexnika universitetida boʻlib oʻtgan Erasmus+ dasturining “SPHERE – Yashil kelishuv doirasida barqaror transport” xalqaro loyihasi trening mashgʻulotlarida ishtirok etishdi.
Turin politexnika universitetida oʻtkazilgan mashgʻulotlarda universitetimiz vakillari barqaror transport yechimlarini joriy etish va kelajak transport tizimlarini rejalashtirish boʻyicha oʻz bilim va koʻnikmalarini oshirdilar. Trening davomida transport infratuzilmasini modernizatsiya qilish, yoʻl harakati oqimini optimallashtirish va ekologik muammolarni hal etish boʻyicha yangi metodologiyalar oʻrganildi.
Dunyo miqyosida urbanizatsiya va transport tizimlarining rivojlanishi jarayonida barqaror transport konsepsiyasini hayotga tatbiq etish dolzarb masalalardan biri hisoblanadi. Toshkent Kimyo xalqaro universitetining ushbu loyihada ishtirok etishi nafaqat ilmiy salohiyatini oshirish, balki Oʻzbekistonning transport tizimlarini ekologik talablar asosida takomillashtirishga ham hissa qoʻshishi kutilmoqda.
