CEU — Испаниянинг энг йирик нодавлат олий таълим муассасаси
Тошкент Кимё халқаро университети таъсисчиси, профессор Алишер Ваҳобов, университетнинг Наманган филиали директори, профессор Тўлқин Расулов, директор ўринбосари Адхамжон Қодиржонов Испаниянинг CEU университетининг Барселона кампуси билан танишдилар.
CEU — Испаниянинг энг йирик нодавлат олий таълим муассасаси бўлиб, Мадрид, Валенсия, Барселона ва Севильяда университет мактаблари ҳамда кампуслари жойлашган.
Тошкент Кимё халқаро университети вакилларига Абад Олиба кампусининг Халқаро алоқалар ва тадқиқотлар бўйича проректори д-р. Алессандро Мини ҳамроҳлик қилди.
Ташриф давомида ижтимоий-гуманитар фанларга ихтисослашган кампуснинг янги биноси, кутубхоналари билан танишиб чиқилди ҳамда дарс жараёнлари кузатилди.
Томонлар янги ўқув йилидан бакалаврлар учун 2+2, 3+1 форматида, магистратура босқичи талабалари учун 1+1 форматида қўшма дастурлар билан бир қаторда қисқа ва ўрта муддатли талабалар алмашинувини ҳам амалга оширишига келишиб олдилар.
