George Fox Universiteti (AQSh) va Toshkent Kimyo xalqaro universiteti oʻrtasida hamkorlik memorandumi imzolandi
Joriy yilning 15 may kuni George Fox Universiteti (AQSh) va Toshkent Kimyo xalqaro universiteti oʻrtasida imzolangan hamkorlik memorandumi oʻzaro aloqalarning yangi bosqichini boshlab berdi. Bu hamkorlik oʻtgan yil may oyida universitet rahbariyatining Amerika Qoʻshma Shtatlariga tashrifi davomida muhokama qilingan edi.
Oʻzaro hamkorlik memorandumi Toshkent Kimyo xalqaro universitetining rektori v.b., professor Karimjon Axmedjanov va George Fox universitetining muhandislik yoʻnalish boʻyicha prorektori, professor Robert Harder oʻrtasida imzolandi. Memorandum ikki universitet oʻrtasida taʼlim va ilmiy tadqiqotlar sohasida oʻzaro hamkorlikni mustahkamlash maqsadida imzolandi.
Hamkorlik doirasida talabalar va oʻqituvchilar almashinuvi, qoʻshma tadqiqot loyihalari va ilmiy konferensiyalar tashkil etish koʻzda tutilgan. Taʼkidlash joizki, bu o’z navbatida universitetlar oʻrtasidagi ilmiy va akademik aloqalarni yanada kengaytirishga xizmat qiladi. Shuningdek, ushbu dastur orqali talabalar global miqyosda taʼlim olish va oʻz sohalarida xalqaro tajriba orttirish imkoniyatiga ega boʻladilar.
Ushbu hamkorlikning kelajakdagi natijalari ikki universitet jamoalarining sa’y-harakatlari va qoʻllab-quvvatlovi bilan yanada samarali boʻlishi kutilmoqda. Tomonlarning bu qadamini ta’lim va ilm-fan sohasidagi xalqaro hamkorlikning ajoyib misoli sifatida baholash mumkin.
