“Jadidlarni yod etib”
2024 yil 8 may kuni “Boshlangʻich, maktabgacha, maxsus taʼlim” fakultetining Pedagogika va psixologiya kafedrasi “Jadidlarni yod etib” mavzusida nihoyatda dolzarb va taʼsirli tadbir tashkil etdi. Ushbu tadbir Oʻzbekistonda maʼrifat va milliy uygʻonish harakatining peshqadamlari boʻlgan buyuk ajdodlarimiz —jadidlarning taʼlim sohasidagi islohotlarini chuqur anglash va qatnashchilarni ulardan ilhomlanishga bagʻishlangan edi.
Tadbirning asosiy maqsadi - jadidlar tomonidan amalga oshirilgan islohotlar va ularning taʼlim sohasiga qoʻshgan hissalari haqidagi bilimlarni keng ommaga yetkazish, shuningdek, ularning ilmiy va pedagogik merosidan oʻqituvchilar va talabalarni bahramand etish edi.
Tadbir davomida jadidlar harakati va ularning taʼlim sohasidagi yutuqlari haqida turli maʼruzalar qilindi. Professorlar va tajribali oʻqituvchilar jadidlar taʼlimotining zamonaviy taʼlim tizimiga qanday taʼsir koʻrsatganini, ularning innovatsion metodlari va islohotlari haqida batafsil maʼlumot berdilar. Xususan, jadidlar tomonidan joriy etilgan yangi uslubiy yondashuvlar, darsliklar va taʼlim berish metodikasi haqida gapirildi.
Shuningdek, tadbir davomida jadidlar adabiyoti va ularning ijtimoiy-siyosiy qarashlari haqida ham soʻz yuritildi. Bu adabiyotlar orqali jadidlar oʻz davrlarida jamiyatda keng tarqalgan qoloqlik va jaholatga qarshi kurashganliklari, ilm-fan va taʼlimni rivojlantirish yoʻlidagi saʼy-harakatlari yoritib berildi.
