Janubiy Koreya va Oʻzbekiston madaniyatiga bagʻishlangan festival boʻlib oʻtdi
Bugun Toshkent shahrida Janubiy Koreya va Oʻzbekiston madaniyatiga bagʻishlangan festival oʻz faoliyatini boshladi. Tadbirda har ikki xalqning boy madaniyati va urf-odatlarini aks ettiruvchi turli tadbirlar tashkil qilindi.
Xabaringiz bor, Toshkent Kimyo Xalqaro Universiteti Janubiy Koreyaning qator nufuzli universitetlari bilan hamkorlik qilib keladi. Mamlakatimizda faoliyat yuritayotgan Janubiy Koreya taʼlim markazi hamda elchixonasi bilan birgalikda qoʻshma loyihalar, grant, stipendiya va imtihon jarayonlarini amalga oshiradi. Bugungi festival doirasida ham koʻplab tadbirlarda faol ishtirok etdi.
Festivalning eng qiziqarli qismlaridan biri bu Koreya madaniyati va sanʼati uyida boʻlib oʻtgan “Fashion Show” tadbiri boʻlib o`tdi. “Liboslar dizayni” yoʻnalishi talabalari tomonidan oʻtkazilgan ushbu namoyishda Oʻzbekiston va Koreya anʼanaviy liboslari taqdim etildi. Har ikki xalqning boy madaniyati va urf-odatlarini aks ettiruvchi liboslar tomoshabinlarni hayratga soldi.
Tadbirning eng muhim qismlaridan biri, Toshkent Kimyo Xalqaro Universiteti va Koreya madaniyati va sanʼati markazi oʻrtasida hamkorlik memorandumi imzolanganligi boʻldi. Ushbu memorandum ikki tashkilot oʻrtasidagi ilmiy va madaniy aloqalarni mustahkamlashga qaratilgan.
Tadbirda TKXU rektori v.b. prof. Karimjon Axmedjanov tomonidan Madaniyat va Ilmiy tadqiqotlar Institutining raisi, janob Ra Jong Okga universitet faxriy professori unvoni topshirildi. Tadbir soʻngida hamkorlarga TKXU tomonidan esdalik sovgʻalari ham berildi.
Shuningdek, tadbir davomida Universitetimiz va Koreyadagi eng katta fondlardan biri boʻlgan Lotte stipendiyasi fondi bilan hamkorlik memorandumi imzolandi. Lotte Foundation raisi - Haesun Chang xonim Toshkent Kimyo xalqaro universitetiga stipendiyalar ajratdi. Bu universitet talabalaiga Koreyadagi eng nufuzli universitetlarda ta`lim olish, dunyoda tan olingan yirik kompaniyalarda ishlab chiqarish amaliyotlarini o`tash imkonini beradi.
Marosimda Koreyadan kelgan nufuzli tashkilot rahbarlari, jumladan Chosun Ilbo, Mail Economy, TV Chosun, MBN, LG, POSCO, KT&G va shu kabi kompaniyalar va ularning vakillari bilan ham kelajakda universitet oʻrtasida hamkorlikni yoʻlga qoyish boycha kelishib olindi.
Mazkur festival Janubiy Koreya va Oʻzbekiston oʻrtasidagi madaniy aloqalarni yanada mustahkamlash va doʻstlik rishtalarini kuchaytirishga xizmat qiladi.
