Joriy yilning 5-fevral kuni Koreyaning nufuzli Pukyong milliy universiteti (PKNU)dan 50 nafar talaba va professor-oʻqituvchilar Toshkent Kimyo xalqaro universitetiga (TKXU) tashrif buyurishdi

Joriy yilning 5-fevral kuni Koreyaning nufuzli Pukyong milliy universiteti (PKNU)dan 50 nafar talaba va professor-oʻqituvchilar Toshkent Kimyo xalqaro universitetiga (TKXU) tashrif buyurishdi. Tashrif doirasida koreys tili yoʻnalishi talabalari bilan oʻzaro fikr almashinuvi boʻlib oʻtdi, shuningdek, turli mavzularda debatlar tashkil qilindi.

Tashrifning asosiy maqsadi – ikki oliygoh talabalari oʻrtasida taʼlim va madaniy almashinuvni rivojlantirish, koreys tiliga boʻlgan qiziqishni oshirish hamda amaliy tajriba almashishdan iborat edi. PKNU talabalari Koreya madaniyatini namoyish etish maqsadida K-POP raqslari va taekvondo sport namoyishini taqdim etdilar. Ushbu chiqishlar tadbir ishtirokchilari uchun qiziqarli va zavqli lahzalar taqdim etdi.

Bundan tashqari, talabalar Janubiy Koreyaning mashhur milliy taomlaridan biri – kimpap tayyorlash boʻyicha mahorat darsida ishtirok etishdi. TKXU talabalari koreys doʻstlari bilan birgalikda ushbu mazali taomni tayyorlab, madaniy almashinuvni yanada yaqinroq his qilish imkoniyatiga ega boʻldilar.

Bunday uchrashuvlar talabalarimizga chet tillarini oʻrganishga boʻlgan qiziqishini oshirish, madaniyatlararo muloqot koʻnikmalarini shakllantirish va xorijiy universitetlar bilan hamkorlik aloqalarini mustahkamlashda muhim ahamiyat kasb etadi.

4