Magistratura sifatini oshirish yo‘lida muhim qadam: ishchi yig‘ilish o‘tkazildi
Universitetda magistratura yo‘nalishlari bo‘yicha ta’lim sifatini yanada kuchaytirishga qaratilgan navbatdagi muhim ishchi yig‘ilish bo‘lib o‘tdi. Yig‘ilishda magistratura mutaxassisliklari mavjud kafedra mudirlari hamda Magistratura bo‘limi rahbari ishtirok etib, magistrantlarning bitiruv bosqichiga puxta tayyorgarligi va o‘quv jarayonini samarali tashkil etish masalalarini muhokama qildilar.
Uchrashuv davomida magistrantlarning shaxsiy kalendar rejalari qay darajada bajarilayotgani tahlil qilindi. Bitiruv oldi amaliyoti bo‘yicha hisobotlarni topshirish muddatlari, hujjatlarni to‘g‘ri rasmiylashtirish talablari aniqlashtirildi. Shuningdek, magistrlik dissertatsiyalarining dastlabki himoyalarini sifatli tashkil etish va rasmiy himoyaga tizimli tayyorgarlik ko‘rish bo‘yicha aniq vazifalar belgilandi.
Kun tartibidagi muhim masalalardan yana biri — ta’lim jarayonini yagona standart asosida olib borish bo‘ldi. Xususan, sillabuslar, amaliyot dasturlari, dissertatsiyalarni rasmiylashtirish bo‘yicha uslubiy qo‘llanmalar, ilmiy konferensiyalar hamda imtihon jarayonlarini uyg‘unlashtirish masalalari muhokama qilindi. Bu esa magistrantlar uchun shaffof va tushunarli akademik muhit yaratishga xizmat qiladi.
Mazkur yig‘ilish magistratura bosqichida ta’lim sifatini oshirish, talabalarning ilmiy salohiyatini kuchaytirish hamda bitiruvchilarning raqobatbardoshligini ta’minlash yo‘lidagi amaliy qadam bo‘ldi. Universitet rahbariyati bu yo‘nalishdagi ishlar izchil davom etishini ta’kidlab, har bir magistrantga sifatli ilmiy rahbarlik va metodik qo‘llab-quvvatlashni kuchaytirish zarurligini alohida qayd etdi.
