Monash professori bilan onlayn ilmiy suhbat o‘tkazildi
Malayziyadagi Monash University Malaysia professori Akrom Xasanov ishtirokida ilmiy suhbat Zoom platformasi orqali onlayn tarzda tashkil etildi.
Suhbat davomida magistratura bosqichida ilmiy tadqiqotlarni sifatini oshirish masalalari alohida e’tibor markazida bo‘ldi. Professor ta’kidlaganidek, bugungi kunda kuchli ilmiy ish faqat nazariyaga emas, balki real hayotdagi muammolarni hal qilishga qaratilgandagina yuqori qiymatga ega bo‘ladi. Masalan, dunyodagi yetakchi universitetlarda tadqiqotlarning katta qismi sanoat, tibbiyot yoki ekologiya kabi sohalardagi aniq muammolar bilan bevosita bog‘lanadi.
Qiziqarli jihatlardan biri shundaki, xalqaro tajribaga ko‘ra, amaliy muammolarga yo‘naltirilgan tadqiqotlar ko‘proq iqtibos olinadi va tezroq natija beradi. Shu bilan birga, ilmiy ish davomida uchraydigan xatolar — noto‘g‘ri tahlil, shoshqaloq xulosa yoki muammoni tor doirada ko‘rish — tadqiqot sifatiga jiddiy ta’sir ko‘rsatishi qayd etildi.
Professor ilmiy natijalardan to‘g‘ri xulosa chiqarish, xatolarni tahlil qilish va ularni keyingi bosqichda takrorlamaslik ilmiy muvaffaqiyatning muhim omili ekanini alohida urg‘uladi.
Ma’lumot uchun, Monash University dunyoning yetakchi universitetlaridan biri bo‘lib, QS World University Rankings 2026-yil natijalariga ko‘ra 36-o‘rinni egallagan.
