Necmettin Erbakan universitetidan (NEU) kelgan delegatsiya aʼzolari “Kimyo University Hospital” klinikasi faoliyati bilan yaqindan tanishdi
Shu kunning oʻzida Necmettin Erbakan universitetidan (NEU) kelgan delegatsiya aʼzolari “Kimyo University Hospital” klinikasi faoliyati bilan yaqindan tanishdi. Soha boʻyicha oʻzaro hamkorlik va tajriba almashish masalalari muhokama qilindi.
Dastavval boʻlib oʻtgan muloqot chogʻida bugungi kunda mamlakatimizda sogʻliqni saqlash tizimida olib borilayotgan islohotlar davlat siyosatining bosh maqsadiga aylangani, bu borada qator meʼyoriy-huquqiy hujjatlar qabul qilinib, sohaning barcha yoʻnalishlarini kompleks rivojlantirish boʻyicha tizimli chora-tadbirlar amalga oshirilayotgani toʻgʻrisida maʼlumot berildi.
Bundan tashqari, davlatimiz rahbari tomonidan xususiy tibbiyot muassasalariga qoʻshimcha shart-sharoit va imtiyozlar berilayotgani natijasida mamlakatimizda xususiy sektorning tibbiyotda rivojlanib borayotgani taʼkidlandi. Shuningdek, muloqotda xodimlar malakasini oshirish, oʻzaro tajriba almashish borasidagi hamkorlik masalalariga ham urgʻu berildi.
Delegatsiya aʼzolaridan biri, NEUda stomatologiya fakulteti dekani Prof. Hakan Yasin Gönder, klinikada yaratilgan shart-sharoitlar zamon talablariga toʻliq javob berishini alohida eʼtirof etdi.
