Ruzvelt universiteti bilan birgalikda MBA 1+1 dasturi

2023-yil 9-fevral kuni Toshkent Kimyo xalqaro universitetiga Amerika Qoʻshma Shtatlarining Illinoys shtati, Chikago shahrida joylashgan Ruzvelt universitetining xalqaro MBA va magistratura yoʻnalishi rahbari Andrea Maykl Marak tashrif buyurdi. Tashrifdan asosiy maqsad - Toshkent Kimyo xalqaro universiteti bilan AQShning Ruzvelt universiteti oʻrtasida 1+1 xalqaro MBA dasturiga start berish va universitetda AQSh taʼlim standartlariga asosan oʻqish tizimini tashkil etish. 1+1 dasturi talabalarga AQSh universitetlaridan biriga oʻqishga kirish va xalqaro darajada taʼlim olish uchun yana bir imkoniyat beradi. Unga koʻra, talaba MBA dasturining 1 yilini Toshkent Kimyo xalqaro universitetida va yana bir yilini AQShning Ruzvelt universitetida oʻqish imkoniga ega boʻladi. Eslatib oʻtamiz, biznesni boshqarish (Master of Business Administration – MBA) dasturi barcha soha va yoʻnalishlar uchun oliy va yuqori malakali rahbar kadrlar tayyorlash boʻyicha jahonda universal taʼlim dasturi deb tan olingan.  Shuningdek, xalqaro hamkorlik kelishuviga asosan, 2023 yilning sentabr oyidan boshlab universitet talabalari AQShning Ruzvelt universitetiga hujjat topshirish imkoniga ega boʻladilar. 
Universitetning AQSh bilan samarali hamkorligining yana bir yorqin namunasi – bu 2021/22 oʻquv yilida  5 nafar amerikalik talablarning Toshkent Kimyo xalqaro universitetiga oʻqishga kelishi boʻlgan edi. Ular talabalar almashinuvi dasturi asosida 1 yil mobaynida biznesni boshqarish va xalqaro marketing yoʻnalishlarida oʻqib qaytishgan edi. 
Qoʻshma hamkorlikdan asosiy maqsad - ikki tomonning birgalikdagi saʼy-harakatlari bilan talabalarga xalqaro standart asosida taʼlim berish va professor-oʻqituvchilar bilan tajriba almashish uchun bir qator amerikalik olim va mutaxassislarni ilmiy, innovatsion loyihalarga jalb qilishdan iborat.