Sanʼat va ilm-fan birlashgan maskan: Toshkent Kimyo xalqaro universitetida muhim hamkorlik.

Sanʼat va ilm-fan birlashgan maskan: Toshkent Kimyo xalqaro universitetida muhim hamkorlik.

2025 yilning bahoriy kunlarida Toshkent Kimyo xalqaro universitetida sanʼat va taʼlim sohalarini birlashtiruvchi muhim voqea boʻlib oʻtdi. Universitet bilan Oʻzbekiston Badiiy ijodkorlar uyushmasi oʻrtasida hamkorlik memorandumi imzolandi.
Mazkur hamkorlik tashabbuskorlari – universitet rektori Ahmedjanov Karimjon Bakidjanovich va Oʻzbekiston Badiiy ijodkorlar uyushmasi raisi, sanʼatshunos olim Valixoʻjayev Ibrohim Mutallievich boshchiligidagi delegatsiyaning rasmiy uchrashuvi davomida memorandum imzolandi. Bu hujjat ijodkorlik, talaba-yoshlar oʻrtasida sanʼatni targʻib qilish va amaliy loyihalarni qoʻllab-quvvatlash yoʻlida muhim poydevor boʻldi.
Uchrashuv doirasida mehmonlar uchun universitetning badiiy ustaxonalari, “Liboslar dizayni” va “Rangtasvir” yoʻnalishlariga oid zamonaviy auditoriyalar boʻylab ekskursiya tashkil etildi. Ushbu tashrif doirasida mehmonlar talabalar ijodiy muhitiga yaqinroq boʻlish, ularning ish jarayoni va ijodiy qarashlari bilan bevosita tanishish imkoniga ega boʻlishdi.
Tadbirning eng yorqin lahzalaridan biri bu — “Yoshlar ijodi” nomli qoʻshma koʻrgazmaning ochilish marоsimi boʻldi. Unda Oʻzbekiston Badiiy ijodkorlar uyushmasining yosh aʼzolari hamda universitetning “Rangtasvir” yoʻnalishida tahsil olayotgan iqtidorli talabalarining asarlari namoyish etildi. Koʻrgazmadagi har bir ish oʻziga xos gʻoya, ranglar uygʻunligi va individual yondashuvi bilan ajralib turdi.
Bu tashrif va imzolangan memorandum kelajakda universitet talabalari uchun nafaqat nazariy, balki amaliy tajriba maktabi boʻlib xizmat qilishi, sanʼat sohasidagi yutuqlarni ommalashtirishda muhim oʻrin egallashi, shubhasiz.