Toshkent Kimyo xalqaro universiteti delegatsiyasi AQShning ilgʻor tibbiyot tizimi bilan tanishmoqda
Toshkent Kimyo xalqaro universitetining oʻquv ishlari boʻyicha prorektori Rod Powell boshchiligidagi delegatsiya hozirda xizmat safari bilan AQShda boʻlib turibdi.
Ushbu tashrif Toshkent Kimyo xalqaro universiteti tibbiyot yoʻnalishlari rivojlanishi uchun muhim qadam boʻlib, AQShning ilgʻor tajribalarini oʻrganish va oʻz taʼlim tizimiga joriy etish imkonini beradi. Delegatsiya aʼzolari mazkur klinikaning innovatsion yondashuvlarini oʻrganib, ularni universitet klinikalarida qoʻllash istiqbollarini muhokama qilishdi.
17-fevral kuni delegatsiya aʼzolari – prorektor Rod Powell, kafedra mudirlari Rustamov Akmal va Elmurodov Shoxjahon AQSHning Portland shahridagi Providence Heart Clinic - St. Vincent shifoxonasiga tashrif buyurishdi.
Dr. Gary Ott mehmonlarga kasalxonaning ishlash tizimi, bemorlarni qabul qilish va roʻyxatga olish jarayonlari, shuningdek, tibbiy sugʻurta va toʻlov tizimi haqida batafsil maʼlumot berdi. Tashrif davomida delegatsiya bemorning davolanish jarayoni qanday amalga oshirilishi, sugʻurta tizimining ishlash mexanizmi hamda tibbiy xizmatlarning toʻliq integratsiyalashgan tizim asosida boshqarilishi bilan yaqindan tanishdi.
Providence Heart Clinic - St. Vincent shifoxonasida bemorlarni qabul qilishdan tortib, toʻliq sogʻayib ketishigacha boʻlgan barcha bosqichlar yagona tizimga bogʻlangan boʻlib, bu shifokorlar va tibbiyot xodimlari uchun ish jarayonini ancha yengillashtiradi. Shuningdek, avtomatlashtirilgan sugʻurta tizimi orqali bemorlarning moliyaviy xarajatlari nazorat qilinadi va bu ularning davolanish jarayonini yanada osonlashtiradi.
