Toshkent Kimyo xalqaro universiteti delegatsiyasi Massachusets texnologiya institutiga (MIT) tashrif buyurdi.
Toshkent Kimyo xalqaro universiteti (KIUT) delegatsiyasi – universitet prorektori Rod Powell va Akmal Rustamov – Massachusets texnologiya instituti (MIT) ga tashrif buyurib, muhandislik sohasida hamkorlikni rivojlantirish bo‘yicha muzokaralar olib bordi.
Tashrif davomida MIT muhandislik dasturlari koordinatori Srini Devadas, MIT NEET (New Engineering Education Transformation) kommunikatsiya bo‘limi vakili Sarah McCullogh hamda MIT TERRASCOPE dasturi rahbari Ari Epstein bilan uchrashdilar. Tomonlar muhandislik ta’limi sohasida hamkorlik, qo‘shma tadqiqot loyihalari va innovatsion ta’lim dasturlarini joriy etish masalalarini muhokama qildilar.
Bu hamkorlik KIUT talabalariga MIT tajribasidan o‘rganish, ilg‘or texnologiyalar bilan ishlash hamda xalqaro ilmiy loyihalarda ishtirok etish imkoniyatini yaratadi. Bundan tashqari, kelajakda professor-o‘qituvchilar almashinuv dasturi va qo‘shma muhandislik laboratoriyalarini tashkil etish rejalashtirilmoqda.
MIT bilan yo‘lga qo‘yilgan bu hamkorlik KIUTning xalqaro ta’lim maydonidagi mavqeini mustahkamlashga, talabalar va professor-o‘qituvchilarga yangi ilmiy izlanishlar va innovatsiyalar yaratish imkonini berishga xizmat qiladi.
Bu tashabbus nafaqat KIUT, balki O‘zbekiston ta’lim tizimi uchun ham muhim qadamlardan biri bo‘lib, ilg‘or texnologiyalar va muhandislik bo‘yicha zamonaviy bilimlarni keng joriy etish uchun yangi ufqlarni ochmoqda.
