Toshkent Kimyo xalqaro universiteti professori AQShda biznes va iqtisod boʻyicha dars oʻtdi
Toshkent Kimyo xalqaro universitetining AQShda boʻlib turgan delegatsiyasi George Fox universitetida biznesni boshqarish yoʻnalishi talabalariga dars oʻtishdi.
Tadbir universitetimiz prorektori janob Rod Powell tomonidan ochilib, u Toshkent Kimyo xalqaro universiteti va Oʻzbekistondagi oliy taʼlim tizimi haqida batafsil maʼlumot berdi. Soʻngra Elmurodov Shoxjahon ekonometrika fanidan maʼruza oʻtib, talabalarga iqtisodiy koʻrsatkichlar orasidagi bogʻliqlik va ularni tahlil qilish usullari haqida tushunchalar berdi.
Uchrashuv davomida George Fox universiteti talabalari Toshkent Kimyo xalqaro universitetida talabalar almashinuvi dasturi doirasida bir semestr oʻqish imkoniyatiga ega ekanliklari ta’kidlandi. Ular ushbu imkoniyatga qiziqib, oʻzlarini qiziqtirgan savollarga javob olishdi.
Mazkur hamkorlik taʼlim almashinuvi va xalqaro akademik hamkorlikni kengaytirish yoʻlida yana bir muhim qadam boʻldi.
