Toshkent Kimyo xalqaro universiteti talabalari Xitoyga yoʻl oldi: Huaqiao universiteti bilan “2+2” qoʻshma dasturining yangi bosqichi
Bugun Toshkent Kimyo xalqaro universitetida Xitoy Xalq Respublikasining nufuzli Huaqiao universitetiga oʻqishini davom ettirish uchun ketayotgan talabalarni kuzatish marosimi boʻlib oʻtdi.
2023 yil 12 sentyabrda Toshkent Kimyo xalqaro universiteti va Huaqiao universiteti oʻrtasida imzolangan “2+2” qoʻshma dasturni yoʻlga qoʻyish shartnomasiga muvofiq, talabalar birinchi ikki yil Toshkentda ta’lim oladilar, soʻngra Xitoyda oʻqishni davom ettiradilar.
Bu yilgi dastur doirasida “Tarjimonlik: xitoy-ingliz” yoʻnalishida tahsil olayotgan 12 nafar talaba HSK 4 darajasini muvaffaqiyatli yakunlab, Huaqiao universitetida oʻqishni davom ettirish imkoniyatiga ega boʻldilar. HSK 4 darajasi Xitoy tili boʻyicha yetarli bilim va koʻnikmalarga ega ekanlikni tasdiqlovchi sertifikat boʻlib, talabalarni chuqur bilim va malakaga ega, xalqaro toifadagi mutaxassis sifatida shakllantirishga xizmat qiladi.
Ikki nafar talaba ikki yil davomida toʻliq grant asosida tahsil olish huquqini qoʻlga kiritdi. Ushbu talabalar oʻz bilimlari va mehnatsevarliklari bilan ajralib turib, Xitoyda oʻqish uchun yetarlicha tayyorgarlik koʻrganliklarini isbotlashdi. Ularning yutugʻi nafaqat oʻzlari uchun, balki butun universitet uchun katta faxr va motivatsiya manbaidir.
Kuzatish marosimi Toshkent Kimyo xalqaro universiteti rahbariyati, professor-oʻqituvchilari va talabalarning oila aʼzolari ishtirokida boʻlib oʻtdi. Marosimda soʻzga chiqqan universitet rektori K. Axmedjanov Huaqiao universitetiga joʻnab ketayotgan talabalarni tabriklab, ularga muvaffaqiyat va omad tiladi. Ular bu dastur doirasidagi hamkorlik ikki davlat oʻrtasidagi ilmiy va madaniy aloqalarni mustahkamlashiga ishonch bildirdi.
