Toshkent Kimyo xalqaro universiteti talabalari Xitoyning Kayfen shahrida 10 kunlik amaliyot o‘tash uchun yo‘lga chiqdi
Joriy yilda Toshkent Kimyo xalqaro universitetining “Arxitektura va shaharsozlik” yo‘nalishi talabalari Xitoyning boy tarixi va zamonaviy arxitekturasini o‘zida mujassam etgan Kayfen shahrida 10 kunlik amaliyot dasturida ishtirok etish uchun jo‘nab ketishdi.
Amaliyot dasturi davomida talabalar Kayfen shahrining o‘ziga xos arxitektura madaniyati bilan yaqindan tanishishadi. Bu shaharning uzoq asrlik me’moriy yodgorliklari, shahar infratuzilmasi va zamonaviy shaharsozlik tendensiyalari bilan ishlash imkoniyati talabalar uchun bebaho tajriba bo‘lishi kutilmoqda. Shuningdek, ular shaharsozlik bo‘yicha ilg‘or texnologiyalarni va shahar infratuzilmasini boshqarish bo‘yicha yangi yondashuvlarni o‘rganish imkoniga ega bo‘ladilar.
Kayfen shahrining tarixi va arxitekturasining turli bosqichlarini o‘rganish, talabalarga qadimiy Xitoy me’moriy an’analari bilan zamonaviy texnologiyalar o‘rtasidagi uyg‘unlikni chuqurroq tushunishga yordam beradi. Ushbu amaliyot doirasida talabalar Kayfenning mashhur obidalari, jumladan qadimiy me'moriy asarlar va shahar devorlari bilan yaqindan tanishib, ularga tegishli arxitektura texnikalarini o‘rganishadi.
Talabalar nafaqat Xitoyning boy madaniy va arxitektura merosi bilan tanishadi, balki Xitoylik mutaxassislar bilan tajriba almashish imkoniyatiga ham ega bo‘lishadi.
Amaliyotning asosiy maqsadlari:
- Xitoyning qadimiy arxitektura yodgorliklarini o‘rganish;
- Zamonaviy shaharsozlik texnologiyalari va urbanistik loyihalar bilan tanishish;
- Qadimiy va zamonaviy arxitektura uyg‘unligiga asoslangan loyihalarni ishlab chiqish.
