Toshkent Kimyo xalqaro universiteti (TKXU) va Janubiy Koreyaning Cheongju universiteti o‘rtasida xalqaro hamkorlik doirasida muhim uchrashuv bo‘lib o‘tdi
Kuni kecha Toshkent Kimyo xalqaro universiteti (TKXU) va Janubiy Koreyaning Cheongju universiteti o‘rtasida xalqaro hamkorlik doirasida muhim uchrashuv bo‘lib o‘tdi. Cheongju universiteti rektori Kim Yoon Bae boshchiligidagi delegatsiyaning TKXUga rasmiy tashrifi universitetlararo aloqalarni yangi bosqichga ko‘tarishda yana bir muhim qadam bo‘ldi.
Delegatsiyani TKXUning ta’sischisi professor A. Vaxobov va rektor K. Axmedjanov samimiy kutib oldilar. Uchrashuv davomida tomonlar ilmiy hamkorlikni yanada chuqurlashtirish, ilmiy tadqiqotlar va ta’lim sohasidagi hamkorlik istiqbollarini kengaytirish bo‘yicha fikr almashdilar.
Tashrifning asosiy mavzusi universitetlar o‘rtasidagi talabalar va professor-o‘qituvchilar almashinuvi dasturlarini yo‘lga qo‘yish, ilmiy izlanishlar va texnologik innovatsiyalarni rivojlantirishga qaratilgan loyihalarni muhokama qilish bo‘ldi. Shuningdek, tomonlar o‘zaro hamkorlikning amaliy jihatlari va kelajakda birgalikda amalga oshirilishi mumkin bo‘lgan qo‘shma loyihalar haqida fikr bildirdilar.
Cheongju universiteti delegatsiyasi TKXUning xalqaro hamkorlik borasidagi sa’y-harakatlarini yuqori baholadi va universitetlar o‘rtasida innovatsion va tadqiqot yo‘nalishida yangi imkoniyatlar yaratilishi lozimligini ta'kidladi. Bu tashrif ikki oliy o‘quv yurtlari o‘rtasidagi ta’lim va ilmiy-tadqiqot sohalaridagi hamkorlikni mustahkamlashga qaratilgan yana bir muhim qadam sifatida tarixda o‘rin oladi.
