Toshkent Kimyo xalqaro universiteti va Janubiy Koreyaning Sunchon milliy universiteti o‘rtasida yangi hamkorlik o‘rnatildi
Joriy yilning 23 oktabr kuni Toshkent Kimyo xalqaro universiteti (TKXU) va Janubiy Koreyaning nufuzli Sunchon milliy universiteti o‘rtasida xalqaro hamkorlik aloqalarini yanada kuchaytirishga qaratilgan muhim shartnoma imzolandi. Ushbu kelishuv ikki universitet o‘rtasidagi o‘zaro akademik almashuvlar va ilmiy hamkorlikning yangi bosqichini boshlab beradi.
Shartnoma imzolash marosimida Sunchon milliy universiteti vitse-prezidenti Mun Seung Tae va TKXU rektori Karimjon Axmedjanov ishtirok etib, ushbu hamkorlik orqali ikki universitet o‘rtasidagi ilmiy va madaniy aloqalarni rivojlantirishga katta umid bildirdilar. Shartnoma doirasida professor-o‘qituvchilar va talabalar almashinuvi, qo‘shma ilmiy tadqiqotlar o‘tkazish, shuningdek, turli xalqaro tadbir va dasturlarda o‘zaro hamkorlik qilish belgilandi.
Ushbu hamkorlik O‘zbekiston va Janubiy Koreya universitetlari o‘rtasidagi akademik aloqalarni mustahkamlashda muhim qadam hisoblanadi. Hamkorlik doirasida vitse-prezident Mun Seung Tae 2025 yil bahorgi semestrida Toshkent Kimyo xalqaro universitetining sakkiz nafar talabasi Sunchon milliy universitetiga almashinuv dasturi asosida o‘qishga qabul qilinishini va’da berdi. Bu kelishuv nafaqat ikki mamlakat ta’lim tizimlari o‘rtasida tajriba almashishga xizmat qiladi, balki talabalar uchun yangi imkoniyatlar va madaniy o‘zaro tushunishni yanada mustahkamlaydi.
Hamkorlikning o‘rnatilishi TKXU uchun xalqaro miqyosda o‘z nufuzini oshirish va QS reytinglariga kirish nuqtai nazaridan ham katta ahamiyatga ega. Universitet ushbu hamkorlik orqali xalqaro akademik maydonda o‘z o‘rnini mustahkamlashga va talabalariga eng yuqori sifatli ta’lim imkoniyatlarini taqdim etishga intilmoqda.
Ushbu yangi hamkorlik ikki davlatning ta’lim va ilmiy hamkorlik sohasidagi yaqinlashuvini ifodalab, xalqaro almashuv va madaniy ko‘priklarning rivojlanishiga o‘z hissasini qo‘shadi. Sunchon milliy universiteti va Toshkent Kimyo xalqaro universiteti o‘rtasidagi ushbu kelishuv kelajakda yanada kengayib, ilm-fan, ta’lim va madaniyat sohalaridagi innovatsion loyihalar uchun asosiy platformaga aylanishi kutilmoqda.
