Toshkent Kimyo xalqaro universiteti va Yaponiya kompaniyalari oʻrtasidagi hamkorlik aloqalari tobora mustahkamlanmoqda
Toshkent Kimyo xalqaro universiteti va Yaponiya kompaniyalari oʻrtasidagi hamkorlik aloqalari tobora mustahkamlanmoqda. Joriy yilning 30 sentyabr kuni universitetimizga Yaponiyaning Okinava shahrida joylashgan mashhur Terumasagumi Co. Ltd qurilish va arxitektura loyihalash korporatsiyasi prezidenti Teruya Keita boshchiligidagi delegatsiyani tashrif buyurdi.
Mehmonlarni universitet rektori Karimjon Ahmedjanov va “Arxitektura va qurilish” yoʻnalishi rahbari Kamoladdin Saidov kutib oldi. Tashrif davomida delegatsiya aʼzolari universitetning muhandislik sohalariga katta qiziqish bildirdilar. Shuningdek, talabalarning ishtiyoqi ham diqqat markazida boʻldi. Talabalar bilan uchrashuvlar va yangi tashkil etilgan yapon tili kurslari oʻquvchilari bilan samimiy suhbatlar tashkil etildi.
Tashrifning asosiy maqsadi - universitetimizning bitiruvchi talabalarini Yaponiyadagi nufuzli tashkilotlarga bevosita ishga yollash, shuningdek, kichik kurs talabalari uchun yozgi amaliyotlarni tashkil qilish va professor-oʻqituvchilarning malakasini oshirish uchun imkoniyatlar yaratishdan iborat boʻldi.
Endilikda bu hamkorlik nafaqat mahalliy tashkilotlar bilan cheklanib qolmasdan, talabalar va professorlarga oʻz bilim va koʻnikmalarini jahonning yetakchi mamlakatlarida yanada rivojlantirish imkoniyatlarini ham taqdim etadi
