Toshkent Kimyo xalqaro universiteti Yevropa va Osiyodagi nufuzli universitetlar bilan hamkorlikni kengaytirib bormoqda
Turkiyaning Istanbul shahrida Evroosiyo Oliy ta’lim sammiti – EURIE 2025 bo‘lib o‘tmoqda. Unda Toshkent Kimyo xalqaro universiteti rektori Karimjon Axmedjanov hamda “Tillar” va “Tarjimashunoslik” ta’lim yo’nalishlari rahbari O‘tkir Bo‘tayevlar ishtirok etishmoqda.
Mazkur sammit Osiyo va Yevropa oliy ta’lim tizimlarini bog‘lovchi nufuzli xalqaro tadbir sifatida 10 yildan buyon muntazam tashkil etib kelinmoqda. EURIE 2025 sammiti ushbu forumning yubiley soni bo‘lib, unda oliy martabali mehmonlar, olimlar va yetuk mutaxassislar ishtirok etishmoqda. Jumladan, Istanbul Aydin universiteti prezidenti janob Mustafa Aydin, Malayziya oliy ta’lim vaziri janob Zambri Abdul Qodir, Buyuk Britaniya Konsulligining oliy ta’lim masalalari bo‘yicha rahbari Martin Houp, Turkiya Oliy ta’lim kengashi raisi doktor Erol Özvar hamda boshqa ko‘plab nufuzli shaxslar o‘z ma’ruzalari bilan qatnashdilar.
Tadbir doirasida oliy ta’limni xalqarolashtirish, zamonaviy tendensiyalar, pedagogik innovatsiyalar va ilmiy izlanishlarni rivojlantirish masalalari atroflicha muhokama qilindi.
Shuningdek, Toshkent Kimyo xalqaro universiteti delegatsiyasi turli xorijiy universitetlar vakillari bilan uchrashuvlar o‘tkazib, istiqbolli hamkorlik yo‘nalishlari, xususan, qo‘shma ilmiy loyihalar va tajriba almashish, talabalar va professor-o‘qituvchilar almashinuvi, stajirovka va malaka oshirish imkoniyatlarini kelishib olishdi.
Ushbu xalqaro ta’lim ko‘rgazmasi doirasida TKXU bilan NAFSA: Association of International Educators (Ta’lim beruvchilar xalqaro assotsiatsiyasi), Embassy of Canada Trade Commissioner Service (Kanada elchixonasi savdo komissariyasi), British Council, FIIBA xalqaro akkreditasiya agentligi (Germaniya), KOC universiteti, University Utara Malaysia, YHANK Institute of Malta, Alanya University kabi xalqaro tashkilot va universitetlar o‘rtasida hamkorlikni yo‘lga qo‘yish masalalari muhokama qilindi.
Bundan tashqari, Universitet vakillari sammit doirasida tashkillashtirilgan “AI Trends and Practices for Digital Marketing and Internationalisation in Higher Education”, “Power of Transnational Education”, “Transformative Global Learning” va boshqa amaliy mashg‘ulot hamda seminarlarda ham faol ishtirok etishmoqda.
