Toshkent Kimyo xalqaro universitetining “Liboslar dizayni” yoʻnalishi talabalarining “Eksperimental grafika” fani doirasida oʻtkaziladigan III anʼanaviy “Avolare” koʻrgazmasi

Eksperimental ijod usulini anʼanaga aylantirgan “Liboslar dizayni” yoʻnalishi ustozlari va talabalaridan navbatdagi tasviriy akt (namoyish). Badiiy soha vakillarining professional oʻsishi, kasbiy mahoratini oshirishi uchun ijodiy izlanishlar, atrofni kuzatish va oʻz rakursidan tahlil qilishi muhim jarayondir. Ushbu anʼanaviy koʻrgazma talabalarning oʻz ustida ishlab, tahlil qilish mahoratlarini tashqaridan baholash imkonini yaratadi.
Yaratilgan grafika, rangtasvir, eksperimental kollaj va instalyatsiyalarda nafaqat goʻzallik, oʻzlikni anglash borasidagi tasviriy mushohadalar, balki qizlar, ayollar xilqatining nozikligi, ularga nisbatan zoʻravonlik, atrof-muhitning ifloslanishi va jamiyatning boshqa aktual muammolarini ekspressiv ifodaviy-vizual shakllar orqali taqdim etganlar. Talabalar oʻz ishlarida boy kompozitsiyalardan foydalanishgan, ishlarning har birida detal va rang sxemasiga maksimal darajada eʼtibor qaratilgan. Asarlarda tasvirlangan chuqur gʻoyaviy masalalar rassomlarning tasviriy tasavvurlari yordamida hissiyotga boy koʻrinishda taqdim etilgan. Koʻrgazmadagi asarlar syujet talqinlari rang-barang boʻlib, dolzarb mavzuni ochib berishda talabalarning professional ijodiy koʻnikmalarini, badiiy jarayondagi muammoli mavzularni his etish iqtidorlarini yaqqol namoyon qilgan. Bu ishlar tomoshabinni befarq oʻtib ketishga izn bermaydi, balki davrning tobora dolzarb boʻlib borayotgan oʻtkir muammolari haqida fikr yuritishga chorlaydi.
Noanʼanaviy ijodiy tajribalar guvohi boʻlishni istagan ijodkorlar va tomoshabinlar uchun koʻrgazma boy taassurotlarni vaʼda qiladi.