Toshkent Kimyo xalqaro universitetining talabalari “OIOIUS-2024 — informatika boʻyicha II ochiq xalqaro olimpiadada” 1 ta oltin va 1 ta kumush medalni qoʻlga kiritishdi
Toshkent Kimyo xalqaro universitetining talabalari “OIOIUS-2024 — informatika boʻyicha II ochiq xalqaro olimpiadada” 1 ta oltin va 1 ta kumush medalni qoʻlga kiritishdi. Anjuman soʻngida xalqaro olimpiada gʻoliblarga medal va diplomlar bilan birga Turkmaniston Respublikasi Prezidenti Serdar Berdimuhamedov nomidan qimmatbaho sovgʻalar topshirildi.
Yogʻshigeldi Kakaev nomidagi Xalqaro neft va gaz universitetida OIOIUS-2024 —informatika boʻyicha II ochiq xalqaro olimpiadaning tantanali ochilish marosimi boʻlib oʻtdi. Toshkent Kimyo xalqaro universiteti nomidan “Axborot tizimlari muhandisligi” yoʻnalishining 4-kurs talabasi Yoʻldoshev Farrux va 3-kurs talabalari Abduhamidov Abduraxmon va Oleg Pak ishtirok etishdi. Talabalarga olimpiada jarayonlarida mentorlik qilgan TKXUning oʻqituvchisi Yusupov Yusuf boshchiligida gʻoliblik qoʻlga kiritildi. Gibrid formatda oʻtkazilgan keng koʻlamli tadbirda Turkmaniston va xorijiy oliy oʻquv yurtlari rahbariyati va professor-oʻqituvchilari ishtirok etdilar. Bayramning asosiy qahramonlari —talabalar, Turkmaniston va turli mamlakatlardan kelgan iqtidorli informatika mutaxassislari boʻldi. Birinchi bosqichda ishtirokchilarga tashkiliy qoʻmita tomonidan tasdiqlangan roʻyxat asosida dasturlash tillaridan amaliy masalalarni yechish boʻyicha 5 ta vazifa berildi. Ikkinchi bosqichda kiberxavfsizlik muammolarini kompleks hal qilish uchun texnik shartlar berildi. Topshiriqlar Turkmaniston va xorijlik professor-oʻqituvchilar va mutaxassislardan iborat ishchi guruh tomonidan ishlab chiqilib, hakamlar hayʼati aʼzolari bilan kelishib olindi.
Bu yil olimpiadada 18 davlat – Turkmaniston, Ozarbayjon, Qozogʻiston, Tojikiston, Oʻzbekiston, Afgʻoniston, Qirgʻiziston, Rossiya, Belarus, Armaniston, Eron, Liviya, Qatar, Turkiya, Germaniya, Ruminiya, Gruziya va Xitoydan jami 52 ta universitetdan 270 nafardan ortiq talaba qatnashdi.
