Transport tirbandliklari
Transport tirbandliklari, yo‘l-transport hodisalari va havoning ifloslanishi — bugun deyarli barcha yirik shaharlarda uchraydigan muammolardir. Ushbu muammolarga samarali yechim topish va ekologik toza kelajak shaharlarini barpo etish uchun yangi bilimlar, zamonaviy texnologiyalar va ulardan foydalana oladigan mutaxassislar zarur. Shu yo‘nalishda muhim qadamni Toshkent Kimyo xalqaro universiteti tashladi — «Intelligent Transportation Systems» laboratoriyasini ochdi. Ushbu loyiha Yevropa Ittifoqining Erasmus+ dasturi doirasida «Barqaror transport» (Green Deal) loyihasi asosida amalga oshirildi va o‘quv jarayonini rivojlantirishda muhim bosqich bo‘ldi. Endilikda «Yo‘l harakatini boshqarish» yo‘nalishi talabalari, yaqin kelajakda esa yangi «Barqaror transport» mutaxassisligi bo‘yicha ta’lim oladigan talabalar amaliy mashg‘ulotlar va ilmiy tadqiqotlar o‘tkazishlari uchun zamonaviy maydonga ega bo‘ldilar. Laboratoriya transport oqimlarini modellashtirish, yo‘l-transport hodisalarini tahlil qilish, xavfsiz harakatni tashkil etish va atrof-muhitga zararli chiqindilar darajasini baholash imkonini beruvchi texnologiyalar bilan jihozlangan. Bu yerda talabalar yo‘llarda xavfsizlikni ta’minlashdan tortib ekologik transport tizimlarini yaratishgacha bo‘lgan global miqyosdagi masalalarni hal etishga yordam beradigan zamonaviy vositalarni o‘zlashtiradilar. Natijada, xalqaro standartlarga to‘liq javob beradigan, raqobatbardosh va mehnat bozorida talab yuqori bo‘lgan yangi avlod mutaxassislari shakllanadi.
