Ustoz va murabbiylar kuniga bagʻishlangan “Sizga taʼzim, aziz ustozlar” nomli tantanali tadbir oʻtkazildi
2024 yil 30 sentyabr kuni Toshkent Kimyo xalqaro universitetida Oʻzbekistonda keng nishonlanadigan bayram - Ustoz va murabbiylar kuniga bagʻishlangan “Sizga taʼzim, aziz ustozlar” nomli tantanali tadbir oʻtkazildi. Tadbirda taʼlim sohasida koʻp yillik tajribaga ega boʻlgan ustozlar va mehmonlar ishtirok etdilar, ular oʻzlarining bebaho bilim va tajribalarini yoshlar bilan oʻrtoqlashdilar.
Tadbirning bosh mehmoni Oʻzbekistonda xizmat koʻrsatgan yoshlar murabbiysi Axmedova Hamida Abdullaevna boʻldi.
Hamida Abdullaevna oʻz maʼruzasida oʻqituvchilik kasbining mashaqqatli va masʼuliyatli tomonlari haqida batafsil toʻxtaldi. U yosh avlodni tarbiyalashda sabr-toqat, mehr va fidoyilikning oʻrni haqida gapirdi.
Tadbirda ishtirok etgan talabalar va professor-oʻqituvchilar Hamida Abdullaevnaga oʻzlarini qiziqtirgan savollar bilan murojaat qilishdi. Savollarning aksariyati oʻqituvchilik kasbining zamonaviy qiyinchiliklari va yutuqlari bilan bogʻliq boʻlib, talabalarning oʻz kasbiy yoʻnalishlarida qanday rivojlanishlari mumkinligi haqida qizgʻin munozaralar boʻldi.
Tadbir davomida universitetning oʻquv jarayonida faol ishtirok etayotgan eng yaxshi oʻqituvchilar ham alohida eʼtirof etildi. Ular oʻzlarining talabalarni oʻqitish va tarbiyalashdagi fidokorona mehnatlari uchun esdalik sovgʻalari bilan taqdirlandilar.
“Sizga taʼzim, aziz ustozlar” tadbiri nafaqat ustozlarni sharaflash, balki yosh avlodni oʻqituvchilik kasbining mashaqqatli va muhim vazifalari bilan tanishtirish uchun ajoyib imkoniyat boʻldi.
