Xabaringiz bor, hozirda Toshkent Kimyo xalqaro universiteti ta’sischisi prof. A.Vaxobov boshchiligidagi delegatsiya rasmiy tashrif bilan Janubiy Koreyada boʻlib turibti
Xabaringiz bor, hozirda Toshkent Kimyo xalqaro universiteti ta’sischisi prof. A.Vaxobov boshchiligidagi delegatsiya rasmiy tashrif bilan Janubiy Koreyada boʻlib turibti.
Joriy yilning 9 avgust kuni delegatsiya a’zolari Sungkyunkwan universitetining vitse-prezidenti janob Kim-Jae-hyun bilan uchrashdilar. Muzokaralar avvalida Prof. A.Vaxobov Toshkent Kimyo xalqaro universitetida yaratilgan shart-sharoitlar, ilmiy salohiyat, professor-oʻqituvchilarning malakasini oshirish dasturlari, talabalarning mehnat bozoriga tayyorlash strategiyasi hamda nufuzli universitetlar bilan hamkorlik rejalari toʻg’risida toʻxtalib oʻtdi. Suhbat davomida janob Kim-Jae-hyun Markaziy Osiyo universitetlari bilan hamkorlik loyihasi doirasida Toshkent Kimyo xalqaro universiteti (TKXU) bilan talabalar almashinuvi dasturini yoʻlga qoʻyish hamda sentyabr oyida boʻlib oʻtadigan Sungkyunkwan Hangul tanlovida TKXUning talabalarining faol ishtirokiga ishonch bildirdi. Uchrashuv soʻngida tomonlar kelgusida professor-o‘qituvchilar, talabalar almashinuvi, ilmiy-tadqiqot ishlarini hamkorlikda bajarish, ta’lim dasturlarini tayyorlash, yozgi va qishki maktablarni tashkil etish, xalqaro konferensiyalar o‘tkazish, xalqaro grantlarda ishtirok etish bo‘yicha hamkorlik aloqalarini muhokama qilishdi.
Shuningdek, ikki universitet oʻrtasida bakalavr dasturida dastlab “Liboslar dizayni”, “Chiroy estetikasi”, “Art-engineering” yoʻnalishlarida 2+2 dasturi hamda 1+1 dasturi boʻyicha magistratura yoʻnalishlarida talabalar almashinuvi loyihalarini amalga oshirishga kelishib olindi.
Ma’lumot oʻrnida: Sungkyunkwan universiteti Janubiy Koreyadagi eng qadimgi ta’lim maskani boʻlib, oʻzining 626 yilligini nishonladi. Jumladan, 2021 yil holatiga koʻra “QS World University rankings” reytingida 88-oʻrinda turadi. Universitet Janubiy Koreyaning biznes reytingida birinchi oʻrinni egallagan Samsung jamgʻarmasining filiali hisoblanadi va hozirda unga qarashli Samsung tibbiyot markazi faoliyat yuritadi.
