Xavfsiz kibermakon va giyohvandlikka qarshi kurash – dolzarb masala sifatida
Bugungi kunda yoshlar tarbiyasida eng muhim masalalardan biri — ularni turli salbiy illatlardan asrash, huquqiy savodxonligini oshirish va kibermakon xavfsizligini ta’minlashdir. Shu maqsadda mamlakatimiz ta’lim muassasalarida muntazam ravishda turli profilaktik tadbirlar o‘tkazilib kelinmoqda.
Shu jumladan, Kimyo International University in Tashkentda ham “Xavfsiz kibermakon va giyohvandlikka qarshi kurash” oyligi doirasida profilaktik uchrashuv tashkil etildi. Tadbirda Toshkent shahar Yakkasaroy tumani IIO FMB rahbariyati va mutasaddi xodimlari ishtirok etib, talabalar bilan ochiq muloqot olib bordilar.
Uchrashuv davomida yoshlarga giyohvandlikka qarshi kurashishning huquqiy va ijtimoiy jihatlari, shuningdek, axborot texnologiyalari sohasida uchraydigan huquqbuzarliklarning oldini olish masalalari yuzasidan batafsil ma’lumotlar berildi. Mutaxassislar ta’lim muassasalarida giyohvandlik jinoyatchiligi va boshqa salbiy holatlarni barvaqt aniqlash hamda bartaraf etish bo‘yicha olib borilayotgan ishlar haqida so‘z yuritdilar.
Shuningdek, uchrashuvda “Jar yoqasida” va “Toshkent Shahar IIBB ogohlantiradi!” mavzularida videoroliklar namoyish etildi. Bu orqali talabalar real hayotiy misollardan kelib chiqib, zaruriy xulosa chiqarish imkoniyatiga ega bo‘ldilar.
Tadbir nafaqat nazariy bilim berish, balki talabalarni hushyorlikka, ogohlikka va mas’uliyat bilan hayot kechirishga undashga xizmat qildi. Eng asosiysi, bunday uchrashuvlar yoshlarning kelajak hayotida to‘g‘ri qarorlar qabul qilishi, sog‘lom turmush tarzini tanlashi va jamiyatda faol fuqarolik pozitsiyasini shakllantirishi uchun mustahkam poydevor bo‘lib xizmat qiladi.
