Xorijdan kelgan mehmonlarga bu madaniy boyliklarni namoyish etish va shu orqali yurtimizga chet ellik talabalarni jalb qilish vazifalarimizdan biridir
O‘zbekistonning boy madaniyati, urf-odatlari va tarixi butun dunyoga tanishtirilishi lozim bo‘lgan bebaho merosdir. Xorijdan kelgan mehmonlarga bu madaniy boyliklarni namoyish etish va shu orqali yurtimizga chet ellik talabalarni jalb qilish vazifalarimizdan biridir. Shu maqsadda, Toshkent Kimyo xalqaro universitetining “Turizm” yo‘nalishi talabalari Amerikaning nufuzli George Fox universitetidan kelgan professorlar bilan Toshkent shahri bo‘ylab sayohat tashkil etdilar.
Mazkur tadbir chet ellik mehmonlar va talabalar uchun ajoyib tajriba almashish imkoniyatini yaratdi. Talabalar mehmonlarni Toshkentning boy tarixiy va madaniy merosi, shuningdek, aholining milliy qadriyatlari va madaniyati bilan yaqindan tanishtirdilar. Sayohat davomida ishtirokchilar Toshkentning diqqatga sazovor joylarini ko‘rishdi, tarixiy yodgorliklar va zamonaviy inshootlarni kuzatishdi.
