Bakalavr dasturlari

Rangtasvir

Toshkent Kimyo xalqaro universitetining “Rangtasvir” bakalavriat ta’lim yo‘nalishi zamonaviy tasviriy san’at va dizayn sohasi uchun kreativ fikrlaydigan, yuksak badiiy did va professional mahoratga ega rassomlarni tayyorlashga qaratilgan. 60210500 — “Rangtasvir” yo‘nalishi bo‘yicha ilk qabul 2021-yilda amalga oshirilgan bo‘lib, kunduzgi ta’lim shaklidagi ilk bitiruvchilar 2025-yilda o‘zbek va rus ta’lim tillari bo‘yicha muvaffaqiyatli tamomlaganlar. O‘qish muddati — 4 yil (bakalavr). 
Mutaxassislar tayyorlash kunduzgi ta’lim shaklida to‘lov-kontrakt asosida amalga oshiriladi.

“Rangtasvir” kafedrasining asosiy maqsadi — talabalarni tasviriy san’at va dizayn sohasida yuqori kasbiy madaniyatga ega, zamonaviy bilim va amaliy ko‘nikmalarni puxta egallagan, original va estetik jihatdan mukammal san’at asarlarini yaratishga qodir professional rassom sifatida tayyorlashdan iborat.
Ta’lim dasturi innovatsion va xalqaro miqyosda talab yuqori bo‘lgan san’at yo‘nalishlaridan biri hisoblanadi. Talabalar davlat, rus va xorijiy tillarda professional bilim olish imkoniyatiga ega bo‘lib, bu ularning xalqaro san’at va dizayn bozorida raqobatbardosh mutaxassis bo‘lib shakllanishiga xizmat qiladi.
Ta’lim davomida talabalar:

•  san’at asarlarini, rang va kompozitsiya imkoniyatlarini tahlil qilish;
•  original san’at va vizual loyihalarni yaratish;
•  turar-joy, jamoat va madaniy muhit uchun badiiy hamda dizayn yechimlarini ishlab chiqish;
•  ijodiy loyihalarni mualliflik nazorati asosida boshqarish

bo‘yicha professional kompetensiyalarga ega bo‘ladilar. 
Dastur milliy ta’lim standartlari, xalqaro san’at tendensiyalari va zamonaviy professional tajribalar asosida ishlab chiqilgan bo‘lib, talabalar ijodiy salohiyati, kasbiy mahorati va badiiy tafakkurini rivojlantirishga qaratilgan.
Bugungi kunda rangtasvir va tasviriy san’at sohasi mutaxassislariga nafaqat mamlakatimizda, balki xalqaro miqyosda ham talab yuqori. Dastur san’at, dizayn va kreativ industriyada faoliyat yuritishga tayyor professional kadrlarni tayyorlashga yo‘naltirilgan.
O‘quv rejasi haqida umumiy ma’lumot
60210500 — “Rangtasvir (Painting)” ta’lim yo‘nalishi bo‘yicha o‘quv dasturi professional rassomlarni tayyorlashga qaratilgan bo‘lib, talabalarda badiiy tafakkur, ijodiy yondashuv va amaliy tasviriy san’at ko‘nikmalarini shakllantirishni maqsad qiladi.
Ta’lim jarayoni 4 yil (8 semestr) davom etadi va umumiy 240 ECTS kreditni tashkil etadi. O‘quv jarayoni nazariy fanlar, amaliy mashg‘ulotlar, ijodiy loyihalar hamda mustaqil ta’limni o‘z ichiga oladi.
O‘quv dasturi quyidagi asosiy yo‘nalishlarni qamrab oladi:

•  badiiy-amaliy fanlar — rangtasvir, qalamtasvir, kompozitsiya va plastik anatomiya;
•  san’at nazariyasi va tarixi — jahon va milliy san’at rivojlanishi, uslublar va yo‘nalishlar;
•  ijodiy rivojlanish fanlari — zamonaviy san’at, konseptual san’at va monumental rangtasvir;
•  qo‘shimcha fanlar — kompyuter grafikasi, art-marketing va art-menejment;
•  o‘quv va ishlab chiqarish amaliyotlari;
•  talabalar qiziqishiga mos tanlov fanlari. 

Ta’lim davomida talabalar mustaqil ijod qilish, san’at asarlarini yaratish, tahlil qilish va namoyish etish bo‘yicha professional bilim va amaliy tajribaga ega bo‘ladilar.
Bitiruv bosqichida talabalar bitiruv malakaviy ijodiy loyihasini bajaradilar hamda yakuniy davlat attestatsiyasidan o‘tadilar.
Xalqaro hamkorlik va ta’lim dasturlari
Yo‘nalishda talabalar va professor-o‘qituvchilar uchun xalqaro akademik hamkorlik va almashinuv dasturlari mavjud.
Talabalar uchun:

•  2+2 qo‘shma ta’lim dasturlari;
•  exchange dasturlari;
•  xorijda o‘qish va amaliyot o‘tash imkoniyatlari;
•  xalqaro ijodiy va ilmiy loyihalarda ishtirok etish imkoniyatlari mavjud. 

Mazkur dasturlar orqali talabalar xalqaro tajriba orttirish, ilg‘or ta’lim tizimlari bilan tanishish va zamonaviy kasbiy ko‘nikmalarni rivojlantirish imkoniga ega bo‘ladilar.
Xalqaro ta’lim dasturlari talabalar dunyoqarashini kengaytiradi, xorijiy tillarni o‘rganish darajasini oshiradi va ularning xalqaro mehnat bozoridagi raqobatbardoshligini mustahkamlaydi.
Hamkor universitetlar:

•  Università Europea del Design
•  Qingdao University of Technology
•  Sungshin Women's University 

Bitiruvchilarning faoliyat sohalari va diplom
“Rangtasvir” yo‘nalishi bitiruvchilari san’at, dizayn va kreativ industriyaning turli yo‘nalishlarida professional faoliyat yuritishlari mumkin.
Faoliyat yo‘nalishlari:

•  san’at studiyalari va rassomlik ustaxonalari;
•  dizayn va interyer loyihalash studiyalari;
•  teatr, kino va reklama industriyasi;
•  davlat va nodavlat san’at muassasalari, galereyalar va muzeylar;
•  oliy ta’lim muassasalari va ilmiy-tadqiqot institutlari;
•  mustaqil ijodiy faoliyat va shaxsiy san’at loyihalari. 

Bitiruvchilar zamonaviy texnologiyalar asosida raqamli rassomlik, animatsiya, multimedia va vizual san’at loyihalarini amalga oshirish imkoniyatiga ega bo‘ladilar.
Mutaxassislik nomi:
60210500 — Rangtasvir
Kvalifikatsiya:
Rangtasvir rassomi
Yo‘nalishning yutuqlari
“Rangtasvir” ta’lim yo‘nalishida o‘quv jarayoni milliy va jahon san’ati an’analari hamda zamonaviy innovatsion yondashuvlar asosida tashkil etilgan.
Yo‘nalishning asosiy yutuqlari:

•  nazariy bilim va amaliy ijodiy faoliyat uyg‘unligi;
•  akademik rangtasvir, kompozitsiya, grafika va san’at tarixini chuqur o‘rganish;
•  individual ijodiy uslub va mualliflik yondashuvini rivojlantirish;
•  tajribali rassom-o‘qituvchilar tomonidan mahorat darslari va ijodiy mashg‘ulotlar;
•  talabalarni respublika va xalqaro ko‘rgazmalar, tanlovlar hamda festivallarda faol ishtiroki;
•  zamonaviy san’at yo‘nalishlari va innovatsion texnikalarni ta’lim jarayoniga joriy etish;
•  ijodiy ustaxonalar bilan jihozlangan professional muhit;
•  san’at, pedagogika va dizayn sohalarida keng karyera imkoniyatlari. 

Dastur zamonaviy, kreativ fikrlaydigan va xalqaro standartlarga mos professional rassomlarni tayyorlashga xizmat qiladi.