Kafedralar

TERAPEVTIK STOMATOLOGIYA KAFEDRASI 

Bugungi kunda stomatologiya sohasi jadal rivojlanib, yangi texnologiyalar, zamonaviy tashxis va davolash usullarining joriy etilishi tufayli terapevtik stomatologiyaning mazmuni ham tubdan o‘zgarib bormoqda. Ilmiy kashfiyotlar, innovatsion biomateriallar va ilg‘or usullar yordamida tish kasalliklarini erta aniqlash, davolash va oldini olish samaradorligi yildan-yilga oshib bormoqda.
Stomatolog shifokorning mahorati faqat kasallikni to‘g‘ri tashxislash va samarali davolash metodlarini qo‘llash bilangina emas, balki bemor bilan to‘g‘ri muloqot o‘rnatish, unga ruhiy dalda berish va sog‘lom hayot tarziga yo‘naltira olish qobiliyati bilan ham o‘lchanadi. Shu bois terapevtik stomatologiyada nafaqat kasbiy bilim, balki tibbiyot xodimining axloqiy fazilatlari ham muhim ahamiyat kasb etadi.
Kafedraning maqsadi
“Dentistry” yo‘nalishida tahsil olayotgan talabalarga terapevtik stomatologiyaning asosiy bo‘limlari bo‘yicha fundamental bilim va klinik ko‘nikmalarni zamonaviy yondashuv asosida berish. Maqsad — yuqori malakali, mustaqil qaror qabul qila oladigan, bemorga sifatli tibbiy yordam ko‘rsatishga qodir mutaxassislarni tayyorlash.
Kafedraning vazifalari

• O‘quv rejalarida belgilangan ma’ruza, amaliy va laboratoriya mashg‘ulotlarini ilmiy-uslubiy va kasbiy darajada o‘tkazish.
• Talabalarning malakaviy amaliyoti, klinik mashg‘ulotlari va ilmiy loyihalariga rahbarlik qilish, ularning bilimini reyting tizimi asosida baholash.
• Kafedra fanlari bo‘yicha sillabuslar, darsliklar, o‘quv qo‘llanmalar va uslubiy ko‘rsatmalar tayyorlash hamda ta’lim jarayoniga joriy etish.
• Klinik faoliyatda zamonaviy tashxis va davolash metodlarini qo‘llash, ularni talabalarga amaliy ko‘nikma sifatida o‘rgatish.
• Iqtidorli talabalarni ilmiy izlanishlarga jalb qilish, olimpiada va tanlovlarda faol ishtirokini ta’minlash.
• Professor-o‘qituvchilarning respublika va xalqaro ilmiy anjumanlarda ishtirokini kengaytirish, ilmiy maqolalar chop etishini rag‘batlantirish.
• Respublika va xalqaro klinik muassasalar bilan hamkorlikni rivojlantirish, amaliyot bazalarini kengaytirish.