Кимё халқаро университети делегацияси дунё илм-фанига катта таъсир кўрсатган Чикаго университетида
Жаҳон иқтисодий тафаккури ривожига катта ҳисса қўшган, кўплаб Нобель мукофоти лауреатлари номи билан боғлиқ Чикаго университети Кимё халқаро университети делегациясининг АҚШга ташрифи давомидаги навбатдаги манзил бўлди.
Тошкент Кимё халқаро университети таъсисчиси, профессор Алишер Ваҳобов бошчилигидаги делегация АҚШнинг нуфузли олий таълим муассасаларидан бири — **Чикаго университети (The University of Chicago)**га ташриф буюриб, бу ердаги таълим жараёни, илмий муҳит ва талабалар учун яратилган шароитлар билан танишди.
1890 йилда ташкил этилган Чикаго университети иқтисодиёт, бизнес, ҳуқуқ, сиёсатшунослик, тиббиёт ва табиий фанлар соҳасидаги илмий тадқиқотлари билан дунёга танилган.
Айниқса, университетда шаклланган Чикаго иқтисодиёт мактаби жаҳон иқтисодий тафаккурида алоҳида ўрин тутади. Милтон Фридман, Жорж Стиглер ва Гари Беккер каби машҳур иқтисодчиларнинг илмий ишлари бозор иқтисодиёти, пул-кредит сиёсати ва инсон хатти-ҳаракатларини иқтисодий таҳлил қилишга оид қарашларнинг ривожланишига катта таъсир кўрсатган.
Кимё халқаро университети делегацияси учун ушбу ташриф етакчи тадқиқот университетида таълим ва илм-фан қандай ташкил этилгани, талабаларнинг мустақил фикрлаши ва илмий изланишларини қўллаб-қувватлаш тажрибасини ўрганиш имконини берди.
Бундай ташрифлар халқаро академик муҳит билан яқиндан танишиш, илғор тажрибаларни таҳлил қилиш ва улардан университетда таълим ҳамда илмий фаолиятни ривожлантиришда фойдаланиш жиҳатидан аҳамиятлидир.
