LONGi Solar Technology kompaniyasi va Toshkent Kimyo xalqaro universiteti

LONGi Solar Technology kompaniyasi va Toshkent Kimyo xalqaro universiteti, o’rtasida O‘zbekistonda quyosh energiyasi sohasida tadqiqot va ta’limni rivojlantirish bo‘yicha o‘zaro hamkorlik memorandumi imzolandi.
Quyosh modullarini yetkazib berish bo‘yicha dunyoning yetakchi LONGi Solar Technology va Toshkent Kimyo xalqaro universiteti o‘rtasida quyosh energetikasi sohasidagi ilmiy-tadqiqot va ta’lim tashabbuslari bo‘yicha o‘zaro hamkorlik memorandumi imzolandi.
Marosimda har ikki tashkilotning yuqori martabali rasmiylari, hukumat va ilmiy doira vakillari va talabalar ishtirok etdi.
Memorandumga muvofiq, LONGi Solar Technology Co., Ltd. kompaniyasi va Toshkent Kimyo xalqaro universiteti qoʻshma ilmiy, amaliy va innovatsion loyihalar, talabalar mobilligi dasturlari, iqtidorli talabalarga grant va stipendiya dasturlari,  bitiruvchilarni o’z sohasiga yo’naltirgan holda ish bilan ta’minlash, universitet bazasida quyosh energetikasi laboratoriyasini tashkil etish, quyosh energiyasi texnologiyalarini rivojlantirishga koʻmaklashish kabi yo’nalishlarda hamkorlik qiladi.
Tadbirda so‘zga chiqqan LONGi Solar Technology kompaniyasi rahbari janob Alex Li shunday dedi: “Biz Toshkent Kimyo xalqaro universiteti bilan O‘zbekistonda quyosh energiyasi sohasida tadqiqot va ta’limni rivojlantirish uchun hamkorlik qilishdan mamnunmiz. Bu hamkorlik nafaqat mahalliy bozor ehtiyojlarini yaxshiroq tushunishimizga yordam beradi, balki bilim va tajribamizni mamlakatdagi talabalar va tadqiqotchilar bilan o’rtoqlashishga ko’maklashadi.”
 Shuningdek, Toshkent Kimyo xalqaro universiteti rektori, professor Janpolat Kudaybergenov: “ LONGi Solar Technology kompaniyasi bilan ushbu hamkorlik quyosh energiyasi bo‘yicha tadqiqot qilish imkoniyatlarimizni kuchaytirishga va talabalarimizga sohadagi eng so‘nggi texnologiyalar va innovatsiyalardan foydalanish imkonini beradi. Biz LONGi Solar Technology kompaniyasi bilan uzoq va samarali hamkorlikka umid qilamiz” - deb tadbirni yakunladi.
Yig’ilish so’ngida LONGi Solar Technology kompaniyasi tomonidan iqtidorli talabalarni qo’llab-quvvatlash maqsadida bir qator talabalarga ta’lim grantlari hamda esdalik sovg’alari taqdim etildi.