Muvaffaqiyatga erishishning asosiy sirlari - bu qattiq mehnat, doimiy oʻqish va insonlar bilan samarali kommunikatsiya qilishdir. Erin Mulder
Muvaffaqiyatga erishishning asosiy sirlari - bu qattiq mehnat, doimiy oʻqish va insonlar bilan samarali kommunikatsiya qilishdir. Erin Mulder
Toshkent Kimyo xalqaro universitetida talabalarga AQShdan kelgan ekspert tomonidan “Amerikada raqamli marketing va marketing tahlili” mavzusida maʼruza tashkil qilindi.
Maʼruzani olib borgan ekspert Erin Mulder, AQShda raqamli marketing agentligida daromad operatsiyalari boʻyicha tahlilchi lavozimida ishlaydi.
Amerika Qoʻshma Shtatlari, digital marketing sohasida dunyo boʻylab yetakchilik qiluvchi mamlakat hisoblanadi. Bu yerda texnologiya va ijtimoiy media platformalarining tez rivojlanishi, marketing strategiyalarining yangi yoʻnalishlarini shakllantiradi. Bugungi kunda, Amerikadagi kompaniyalar oʻz mahsulot va xizmatlarini targʻib qilishda anʼanaviy reklama usullaridan koʻra, digital marketingga koʻproq tayanadilar. Bu holat, isteʼmolchilarning internetdan foydalanish odatlarining oʻzgarishi va digital media orqali maʼlumot olishga boʻlgan qiziqishlarining ortishi bilan bogʻliq.
SEO (Search Engine Optimization), yaʼni qidiruv tizimlarini optimallashtirish, Amerikada digital marketingning asosiy qismlaridan biridir. Bu usul orqali kompaniyalar veb-saytlarini qidiruv tizimlarida yuqori oʻrinlarga chiqarishga harakat qiladilar, bu esa ularning saytlariga koʻproq tashrif buyuruvchilarni jalb qiladi. Shu bilan birga, sifatli va maʼlumotga boy kontent yaratish, yaʼni kontent marketingi ham muhim oʻrin tutadi. Maqola, blog postlari, video va infografikalar orqali kompaniyalar oʻz brendlarini kuchaytirishadi va isteʼmolchilar bilan chuqurroq aloqa oʻrnatishadi.
Ijtimoiy media platformalari, jumladan, Facebook, Instagram, Twitter va LinkedIn, Amerikada digital marketing strategiyalarining ajralmas qismidir. Kompaniyalar ushbu platformalarda oʻz mahsulot va xizmatlarini targʻib qilish orqali keng auditoriyaga yetib borishadi. Ijtimoiy media orqali reklama kampaniyalari, mahsulotlarni tanishtirish va mijozlar bilan bevosita muloqot qilish imkoniyatlarini taklif etadi.
E-mail marketing, yaʼni elektron pochta orqali marketing ham Amerikada keng tarqalgan usullardan biridir. Kompaniyalar, mijozlar bazasiga maxsus takliflar, yangiliklar va mahsulot haqida maʼlumotlar yuborish orqali sotuvlarni oshirishga va mijozlar bilan aloqani mustahkamlashga harakat qiladilar.
Xulosa qilib aytganda, ekspert mehmonimiz olib borgan maʼruza marketing sohasini oʻrganayotgan talabalar uchun manfaatli boʻldi.
