Nejmettin Erbakan davlat universiteti rektori Dr. Cem Zorlu Toshkent Kimyo xalqaro universitetiga tashrif buyurdi
Joriy yilning 10 oktyabr kuni Nejmettin Erbakan davlat universiteti rektori, doktor Cem Zorlu boshchiligidagi delegatsiya Toshkent Kimyo xalqaro universitetiga (TKXU) tashrif buyurdi. Delegatsiya aʼzolarini TKXU taʼsischisi Alisher Vaxobov va rektori Karimjon Axmedjanov kutib oldilar. Uchrashuvda oʻzaro hamkorlikning yangi istiqbollari muhokama qilindi.
Jumladan taʼlim sohasida xalqaro aloqalarni kengaytirish, ilmiy tadqiqotlar va innovatsion loyihalar boʻyicha hamkorlikni rivojlantirish masalalariga alohida eʼtibor qaratildi.
Mehmonlar TKXU klinikasi va tibbiyot fakultetlari bilan ham yaqindan tanishib, ushbu yoʻnalishdagi taʼlim va amaliyotning tashkil etilishi bilan qiziqdilar.
Shuningdek, Dr. Cem Zorlu TKXU talabalariga dunyoda tez oʻzgarayotgan taʼlim va ilmiy sohadagi global tendensiyalar haqida qimmatli ma’lumotlar berdi. U xalqaro universitetlar oʻrtasidagi hamkorlik nafaqat taʼlim sifatini oshirishi, balki kelajakdagi salohiyatli kadrlarni tayyorlashda muhim rol oʻynashini taʼkidladi.
Tashrif yakunida Toshkent Kimyo xalqaro universiteti va Nejmettin Erbakan davlat universiteti oʻrtasida yaqin hamkorlikni mustahkamlash, yangi qoʻshma loyihalar va tashabbuslarni amalga oshirish boʻyicha kelishuvga erishildi. 2022 yil 4 oktyabr kuni imzolangan hamkorlik memorandumi shartlari yangilandi.
