Toshkent Kimyo xalqaro universiteti delegatsiyasi Ruzvelt universitetiga rasmiy tashrif bilan bordi
Toshkent Kimyo xalqaro universiteti (TKXU) nomidan rasmiy tashrif bilan borgan delegatsiya aʼzolariga boshchilik qilayotgan iqtisodiyot fanlari doktori, prof. Vahobov Abdurahim Vosiqovichni Ruzvelt universitetining oʻquv ishlari boʻyicha prorektori va ijrochi vitse-prezidenti, MBA direktori, doktor Andrae Marak kutib oldi. Tashrif ikki oliy oʻquv yurti oʻrtasida avval tuzilgan hamkorlik memorandumining davomi boʻldi.
Uchrashuvda ikki tomonlama xalqaro aloqalarni rivojlantirish, talabalarga yangi imkoniyatlar yaratish, MBA dasturlarini kengaytirish, professor-ustozlarning yozgi malaka oshirish kurslarini yoʻlga qoʻyish boʻyicha muzokaralar olib borildi.
Eng asosiy eʼtibor Ruzvelt universitetining MBA dasturi orqali Oʻzbekistondagi mahalliy biznes muhitining oʻziga xos ehtiyojlari bilan uygʻunlashtirishga qaratilgan noyob taʼlim tashabbusi – 1+1 dasturining batafsil muhokamasiga qaratildi. Bu oliy taʼlim sohasidagi global oʻzaro bogʻliqlik hamda biznes va menejmentni oʻrganishda mukammallikka intilishdan dalolat beradi.
Shuningdek, tomonlar 2024/2025 oʻquv yilidan boshlab ikki universitet oʻrtasida 2+2 dasturi asosida bakalavriat taʼlim yoʻnalishini ochish va qabul jarayonlarini boshlash boʻyicha ish rejasini tuzib olishdi.
Ruzvelt universiteti vakillari Toshkent Kimyo xalqaro universiteti bilan uzoq istiqbolga moʻljallangan munosabatlarni yangi bosqichga koʻtarishdan manfaatdor ekanini qayd etdi.
Eslatib oʻtamiz, joriy yilning aprel oyida TKXUning taʼsischisi prof. A.Vahobov hamda rektor J.Kudaybergenov Ruzvelt universitetida rasmiy tashrif bilan boʻlib, hamkorlik shartnomasini imzolashgan edi.
Maʼlumot oʻrnida: hozirda TKXU nomidan rasmiy tashrif bilan AQSHda boʻlib turgan delegatsiya aʼzolari - Iqtisodiyot fanlari doktori, Professor Vaxabov Abduraxim Vosiqovich, Sirtqi taʼlim yoʻnalishi rahbari, Doktor Vosiqov Ulugʻbek Alisherovich, Xalqaro iqtisodiyot kafedrasi mudiri Iqtisodiyot fanlari doktori, Professor Rasulov Toʻlqin Sattarovich, Xalqaro hamkorlik boʻlimi boshligʻi Raxmatillayev Sarvarbek Botirjonovich, “Xalqaro marketing va turizm” yoʻnalishi rahbari muovini Mamadaliyev Karimjon Baxodirovich.
