Toshkent Kimyo xalqaro universitetida Oʻzbekiston Respublikasi Ichki ishlar vazirligi Qorovul qoʻshinlari qoʻmondoni tashabbusi bilan “Xotira va qadrlash — inklyuziv jamiyat poydevori!” mavzusida maʼnaviy-maʼrifiy tadbir tashkil etildi.
Tadbirda IIV Qorovul qoʻshinlarining Namunali ko‘rgazmali orkestr jamoasi, 52-son ko‘p funksiyali korreksion maktab rahbariyati, pedagoglar hamda alohida taʼlim ehtiyojiga ega boʻlgan bolalar ishtirok etdi.
Mazkur uchrashuv jamiyatda inson qadri, mehr-oqibat va inklyuziv muhitni mustahkamlashga qaratilgani bilan ahamiyatli boʻldi. Tadbir davomida bolalar uchun musiqiy chiqishlar, samimiy muloqotlar va maʼnaviy dasturlar tashkil etilib, ularning jamiyatdagi oʻrni va imkoniyatlariga alohida eʼtibor qaratildi.
Bugungi kunda inklyuziv taʼlim va teng imkoniyatlar masalasi nafaqat taʼlim tizimi, balki butun jamiyat taraqqiyotining muhim mezoniga aylanmoqda. Shu maʼnoda, bunday tadbirlar yosh avlod qalbida mehr, hurmat va qadrlash tuygʻularini shakllantirishga xizmat qiladi.
