Bakalavr dasturlari

Maktabgacha ta’lim

Toshkent Kimyo xalqaro universitetining “Maktabgacha ta’lim” bakalavriat ta’lim yo‘nalishi maktabgacha yoshdagi bolalarga zamonaviy pedagogik yondashuvlar asosida ta’lim va tarbiya bera oladigan malakali pedagog kadrlarni tayyorlashga qaratilgan. Yo‘nalishga ilk talabalar 2019-yildan boshlab qabul qilingan.

Dastur bolalarning intellektual, jismoniy, ijtimoiy va ijodiy rivojlanishini xalqaro standartlar asosida tashkil etishga yo‘naltirilgan bo‘lib, talabalarda pedagogik mahorat, kreativ fikrlash va bolalar psixologiyasi bo‘yicha zarur kompetensiyalarni shakllantiradi.
Abituriyentlardan 11 yillik umumiy o‘rta ta’limni tamomlaganlik to‘g‘risidagi hujjat talab etiladi. Qabul suhbat asosida amalga oshiriladi va bunda abituriyentlarning bilim darajasi hamda kasbiy qiziqishlari baholanadi.

Yo‘nalishning maqsadi va vazifalari
Dastur quyidagi asosiy maqsadlarni qamrab oladi:

•  maktabgacha yoshdagi bolalarga sifatli ta’lim va tarbiya bera oladigan zamonaviy pedagoglarni tayyorlash
•  xalqaro standartlarga mos metodikalar asosida bolalarning aqliy, jismoniy va ijtimoiy rivojlanishini ta’minlash
•  talabalarni kreativ fikrlash, ijodkorlik va zamonaviy pedagogik yondashuvlar asosida ishlashga tayyorlash
•  ilmiy-tadqiqot va pedagogik faoliyat uchun zarur kasbiy kompetensiyalarni shakllantirish
•  mantiqiy o‘yinlar, viktorinalar, sport va rivojlantiruvchi metodikalarni amaliyotga tatbiq etishni o‘rgatish

O‘quv rejasi haqida umumiy ma’lumot
O‘quv dasturi bosqichma-bosqich nazariy bilim va amaliy ko‘nikmalarni shakllantirish asosida tashkil etilgan.
Birinchi kurs
Talabalar maktabgacha ta’lim metodikasiga kirish, umumiy pedagogika, axborot texnologiyalari va xorijiy tillarni o‘rganadilar. Universitetda 5 ta xorijiy tilni tanlash imkoniyati mavjud bo‘lib, bu talabalarning xalqaro kompetensiyalarini rivojlantirishga xizmat qiladi.
Ikkinchi kurs
Talabalar mutaxassislik fanlarini chuqurroq o‘rganishni boshlaydilar. Jumladan:

•  Bolalar jismoniy tarbiyasi
•  Rivojlanish psixologiyasi
•  Maktabgacha pedagogika
•  Bolalar nutqini rivojlantirish metodikasi
•  Bolalarning ijtimoiy moslashuvi
•  Maktabgacha ta’limda axborot texnologiyalari
•  Maktabgacha ta’limda chet tillarini o‘qitish metodikasi

kabi fanlar o‘qitiladi.
Uchinchi kurs
Asosiy e’tibor zamonaviy o‘qitish metodlari, tadqiqot usullari, kasbiy pedagogika va tarbiyachilik mahoratini rivojlantirishga qaratiladi. Talabalar amaliy mashg‘ulotlar va professional amaliyot orqali real ta’lim muhitida tajriba orttiradilar.
Xalqaro hamkorliklar va ta’lim dasturlari
Yo‘nalish xalqaro akademik hamkorlik va talabalar mobilligini faol qo‘llab-quvvatlaydi. Universitetning Janubiy Koreyaning qator nufuzli oliy ta’lim muassasalari bilan hamkorlik dasturlari mavjud.
Hamkor universitetlar:

•  Hanyang University
•  Hankyong National University
• Busan University of Foreign Studies
•  Jeonju University
•  Chosun University
•  Gachon University
•  Daegu University

Talabalar va professor-o‘qituvchilar uchun:

•  2+2 dasturlari
•  exchange dasturlari
•  xorijda o‘qish va amaliyot imkoniyatlari

mavjud bo‘lib, bu dasturlar talabalarning dunyoqarashi, til bilimi va xalqaro mehnat bozoridagi raqobatbardoshligini oshirishga xizmat qiladi.
Bugungi kunga qadar Koreya Respublikasida tahsil olib qaytgan bitiruvchilar soni 43 nafardan oshgan.
Bitiruvchilarning faoliyat sohalari va diplom
“Maktabgacha ta’lim” yo‘nalishi bitiruvchilari quyidagi sohalarda faoliyat yuritishlari mumkin:

•  davlat va xususiy maktabgacha ta’lim tashkilotlari
•  bolalar rivojlantirish markazlari
•  ta’lim loyihalari va dasturlari
•  pedagogik va metodik markazlar

Bitiruvchilar quyidagi lavozimlarda ishlash imkoniyatiga ega:

•  maktabgacha ta’lim tashkiloti tarbiyachisi
•  ilk yoshdagi bolalar pedagogi
•  metodist
•  ta’lim dasturlari koordinatori
•  bolalar markazi direktori
•  maktabgacha ta’lim tashkiloti rahbari

Mutaxassislik nomi:
60110200 — Maktabgacha ta’lim
Kvalifikatsiya:
Maktabgacha ta’lim tashkiloti pedagogi va uslubchisi
Yo‘nalishning yutuqlari
Yo‘nalish doirasida maktabgacha ta’lim tizimi bilan amaliy hamkorliklar yo‘lga qo‘yilgan.
Xususan:

•  Maktabgacha va maktab ta’limi vazirligining Ixtisoslashtirilgan ta’lim muassasalari agentligi huzuridagi Fan olimpiadalari markazi bilan strategik hamkorlik
•  maktabgacha ta’lim tashkilotlari direktor va mutaxassislarini qayta tayyorlash hamda malakasini oshirish bo‘yicha hamkorlik dasturlari amalga oshirilmoqda.

Dastur nazariya va amaliyotni uyg‘unlashtirgan holda talabalarni zamonaviy maktabgacha ta’lim tizimi uchun raqobatbardosh va kreativ pedagog sifatida tayyorlashga xizmat qiladi.