“Atrof muhitni muhofaza qilish va yashil iqtisodiyot yili” doirasida atrof-muhit muhandisligi bo‘yicha magistrlar tayyorlashga qaratilgan yangi loyihaga start berildi
18–19 fevral kunlari Toshkent Kimyo xalqaro universitetida Erasmus+ dasturining “GREENDT: Barqaror o‘tish va jamiyat o‘zgarishi orqali Atrof-muhit muhandisligi bo‘yicha magistratura dasturlarini joriy etish” loyihasining ochilish uchrashuvi bo‘lib o‘tdi.
Tadbirda Oliy ta’lim, fan va innovatsiyalar vazirligi, Ekologiya, atrof-muhitni muhofaza qilish va iqlim o‘zgarishi vazirligi vakillari, Yevropa Ittifoqining O‘zbekistondagi elchisi Janobi Oliylari Toivo Klaar, shuningdek, O‘zbekiston va Yevropadagi hamkor universitetlar vakillari ishtirok etdilar. Mehmonlar loyiha ahamiyati, ta’lim va sanoat integratsiyasidagi o‘rni, yosh mutaxassislarning bilim va malakasini oshirishdagi hissasi haqida fikr bildirdilar.
Qayd etilganidek, GREENDT loyihasi atrof-muhit muhandisligi sohasida ta’lim sifatini oshirish, xalqaro hamkorlikni kengaytirish va barqaror rivojlanishga hissa qo‘shish yo‘lida muhim qadam bo‘lishi kutilmoqda.
Ma’lumot uchun, ushbu loyiha Portugaliyaning Viana do Castelo Politexnika Instituti (IPVC) tomonidan muvofiqlashtirilmoqda.
GREENDT loyihasining asosiy maqsadi – O‘zbekiston oliy ta’lim muassasalari professor-o‘qituvchilari va talabalari bilim va ko‘nikmalarini oshirish bo‘lib, bu jarayonda Yevropa Ittifoqi OTMlaridan tajriba almashinuvi yo‘lga qo‘yiladi. Loyiha Yevropa Komissiyasining Yashil Kelishuv (Green Deal) ustuvor yo‘nalishlariga mos ravishda atrof-muhitni muhofaza qilish bo‘yicha barqaror rivojlanishni qo‘llab-quvvatlaydi.
Loyiha doirasida quyidagi natijalarga erishish rejalashtirilgan:
•loyiha ishtirokchilari bo‘lgan O‘zbekiston oliygohlarida atrof-muhit muhandisligi bo‘yicha magistrlar tayyorlashni tashkil etish;
•12 ta yangi fan ishlab chiqish va o‘quv materiallarini yaratish;
•5 ta yangi laboratoriya tashkil etish (KIUT, JizPI, FerPI, ASTI, CAGU);
•Barcha o‘quvchilar uchun bepul E-learning platformasini ishga tushirish;
•Loyiha faoliyati, uchrashuvlar, treninglar, vebinarlar va muhim tadbirlar haqida ma’lumot beruvchi veb-platforma yaratish;
•Markaziy Osiyoda atrof-muhit muammolarini hal qilish va barqaror rivojlanishni qo‘llab-quvvatlash uchun E-jamiyat platformasini yaratish;
•Talabalar almashinuv imkoniyatlarini yaratish.
