Malayziya batik san’ati KIUT talabalarining ijodiy ustaxonasida
Mato, mum va ranglar uyg‘unligidan yaraladigan batik san’ati endi KIUT talabalarining ijodiy mashg‘ulotlariga ham kirib keldi.
“Malaysia – Uzbekistan Fashion Batik Project – ITEMU 2026” xalqaro loyihasi doirasida Malayziyalik mutaxassislar Toshkent Kimyo xalqaro universitetiga tashrif buyurib, “Liboslar dizayni” yo‘nalishi talabalari uchun amaliy mahorat darslarini boshladi.
Batik — matoning ayrim qismlariga mum surtib, so‘ng uni bo‘yash orqali naqsh yaratishning qadimiy usuli. Bu san’at Janubi-Sharqiy Osiyo xalqlari, jumladan, Malayziya madaniyatida alohida o‘rin tutadi.
Mahorat darslarida talabalar an’anaviy batik texnikalarini bevosita Malayziyalik ustalardan o‘rganib, milliy naqshlarni zamonaviy liboslar dizayni bilan uyg‘unlashtirish ustida ishlamoqda.
Loyiha ikki mamlakatning ijodiy tajribasini birlashtirib, yosh dizaynerlar uchun yangi imkoniyatlar yaratmoqda.
