Toshkent Kimyo xalqaro universiteti Yaponiyaning TOTO kompaniyasi bilan dual ta’lim dasturini yo‘lga qo‘yish imkoniyatlarini muhokama qildi
Toshkent Kimyo xalqaro universiteti ta’sischisi, professor Alisher Vahobov boshchiligidagi delegatsiyaning Yaponiyaga tashrifi doirasida 9-noyabr kuni Okinavada dunyoga mashhur TOTO kompaniyasi rahbariyati bilan uchrashuv bo‘lib o‘tdi.
1917-yilda tashkil etilgan TOTO Yaponiyaning sanitariya-texnika mahsulotlari ishlab chiqaruvchi yirik kompaniyalaridan biri hisoblanadi. Ayniqsa, uning WASHLET® texnologiyasi xalqaro bozorda keng tanilgan. Kompaniyaning 2026-yil 31-martda yakunlangan moliya yilidagi savdo tushumi qariyb 4,9 milliard AQSh dollarini tashkil etgan.
Uchrashuvda universitetdagi nazariy ta’limni Yaponiyaning ilg‘or ishlab chiqarish tajribasi bilan uyg‘unlashtirish masalasiga alohida e’tibor qaratildi. Xususan, KIUT tomonidan talabalar universitetda bilim olib, TOTO korxonalarida amaliy ko‘nikmalarni egallashiga asoslangan qo‘shma dual ta’lim dasturini ishlab chiqish taklif etildi.
Shuningdek, universitetning muhandislik yo‘nalishlari bitiruvchilari hamda KIUT tomonidan tashkil etilishi rejalashtirilayotgan xalqaro texnikumning kelgusi bitiruvchilari uchun TOTO korxonalarida o‘z mutaxassisligi bo‘yicha ishlash imkoniyatlari muhokama qilindi.
Mazkur muzokaralar KIUTning «Ta’lim + iqtisodiyot» tashabbusi doirasida olib borilmoqda. Tashabbusning asosiy maqsadi — ta’lim jarayonini ishlab chiqarish bilan yaqinlashtirish, talabalarni mehnat bozorining real talablariga mos tayyorlash hamda xalqaro kompaniyalar bilan amaliy hamkorlikni rivojlantirishdir.
Tomonlar muhokama qilgan takliflar kelgusida talabalar uchun Yaponiyaning zamonaviy ishlab chiqarish muhitida tajriba orttirish va xalqaro mehnat bozoriga chiqish imkoniyatlarini kengaytirishga xizmat qilishi mumkin.
