Toshkent Kimyo xalqaro universitetida Texnologiyalar va innovatsiyalarni qo‘llab-quvvatlash markazi tashkil etildi.
Toshkent Kimyo xalqaro universiteti hamda O‘zbekiston Respublikasi Adliya vazirligi huzuridagi “Intellektual mulk markazi” davlat muassasasi o‘rtasida hamkorlik Bitimi imzolandi. Bitim asosida universitet huzurida Texnologiyalar va innovatsiyalarni qo‘llab-quvvatlash markazi faoliyati yo‘lga qo‘yiladi.
Hamkorlik doirasida “Intellektual mulk markazi” mutaxassislari tomonidan universitet ilmiy xodimlari uchun intellektual mulk asoslari, patent olish, mualliflik huquqi va ilmiy ishlanmalarni huquqiy himoya qilishga bag‘ishlangan tanishtiruv taqdimoti o‘tkazildi.
Yangi markaz ilmiy xodimlar, tadqiqotchilar va ixtirochilarga patent bazalaridan foydalanish, patent qidiruvlarini amalga oshirish, talabnoma hujjatlarini tayyorlash, xalqaro patent olish hamda ilmiy ishlanmalarni tijoratlashtirish bo‘yicha amaliy va konsultativ yordam ko‘rsatadi.
Mazkur hamkorlik universitetdagi ilmiy g‘oyalarni huquqiy himoyalangan va amaliy qiymatga ega innovatsion loyihalarga aylantirish uchun yangi imkoniyatlar yaratadi.
