UCSI Group asoschisi boshchiligidagi delegatsiya KIUTga tashrif buyurdi
Toshkent Kimyo xalqaro universitetida (KIUT) Malayziyaning yetakchi ta’lim tashkilotlaridan biri — UCSI Group delegatsiyasi bilan uchrashuv bo‘lib o‘tdi.
Delegatsiyaga UCSI Group asoschisi va ijrochi raisi Dato’ Peter T. S. Ng hamda UCSI Group Strategik rivojlanish bo‘yicha vitse-prezidenti doktor Raj Kumar boshchilik qildi. Mehmonlarni Toshkent Kimyo xalqaro universiteti ta’sischisi Alisher Vahobov kutib oldi.
Uchrashuv davomida xalqaro akademik hamkorlikni rivojlantirish, talabalar va professor-o‘qituvchilar almashinuvi dasturlarini kengaytirish, qo‘shma ta’lim dasturlarini yo‘lga qo‘yish hamda ilmiy-tadqiqot faoliyati bo‘yicha hamkorlik istiqbollari muhokama qilindi.
1986-yilda tashkil etilgan UCSI University bugungi kunda Malayziyaning eng nufuzli xususiy universitetlaridan biri hisoblanadi. Universitetda biznes, muhandislik, tibbiyot, farmatsiya, axborot texnologiyalari, mehmondo‘stlik va boshqa yo‘nalishlar bo‘yicha ta’lim berilib, unda 120 dan ortiq mamlakatlardan kelgan talabalar tahsil oladi.
Tashrif davomida tomonlar ikki universitet o‘rtasidagi hamkorlik imkoniyatlarini ko‘rib chiqib, xalqaro ta’lim va ilmiy loyihalarni rivojlantirish bo‘yicha fikr almashdilar.
