YANGI O‘QUV YILI MUBORAK!
Hurmatli professor-o‘qituvchilar, aziz talabalar hamda qadrli universitet jamoasi!
Barchangizni yangi 2026/2027 o‘quv yili boshlanishi hamda Bilimlar kuni munosabati bilan chin qalbimdan samimiy muborakbod etamiz!
Yangi o‘quv yili — bu shunchaki navbatdagi akademik davrning boshlanishi emas. Bu — yangi maqsadlar, yangi imkoniyatlar, ilmiy va ijodiy izlanishlar, yuksak natijalar sari qo‘yiladigan yangi qadamdir.
Bugun zamonaviy universitetning vazifasi faqat bilim berish bilan cheklanmaydi. Universitet — mustaqil fikrlaydigan, mas’uliyatni o‘z zimmasiga oladigan, innovatsion yechimlar yaratadigan va jamiyat taraqqiyotiga munosib hissa qo‘sha oladigan shaxslarni shakllantiradigan intellektual ekomakondir.
Shu bois yangi o‘quv yilida oldimizda yanada yuksak vazifalar turibdi: ta’lim sifatini oshirish, ilmiy tadqiqotlarni rivojlantirish, xalqaro hamkorlikni kengaytirish, innovatsion ta’lim texnologiyalarini joriy etish va universitetimizning xalqaro akademik nufuzini yanada mustahkamlash.
Aziz talabalar!
Universitetda o‘tayotgan har bir kuningiz — kelajagingizga kiritilayotgan eng muhim sarmoyadir. Imkoniyatlardan unumli foydalaning, izlanishdan va yangilikka intilishdan to‘xtamang. Bilimni faqat diplom olish vositasi emas, balki hayotni, jamiyatni va kelajakni o‘zgartirish qudrati sifatida qabul qiling.
Hurmatli professor-o‘qituvchilar!
Sizning bilimingiz, ilmiy salohiyatingiz, pedagogik mahoratiңiz va fidokorona mehnatingiz universitetimiz taraqqiyotining eng muhim tayanchidir. Har bir talabaning yutug‘ida ustozning mehnati, ishonchi va mas’uliyati mujassam. Yangi o‘quv yilida ham yosh avlodni bilimli, raqobatbardosh va yuksak ma’naviyatli mutaxassislar etib tarbiyalashdek sharafli vazifada barchangizga kuch-g‘ayrat tilaymiz.
Ishonchim komilki, 2026/2027 o‘quv yili universitetimiz uchun barcha faoliyat yo‘nalishlarida sifat, mazmunan yangilanish, ilmiy tadqiqot bo‘yicha yuksalish va yangi xalqaro natijalar yili bo‘ladi.
Barchangizga mustahkam sog‘liq, oilalaringizga tinchlik-xotirjamlik, o‘qish va mehnat faoliyatingizda ulkan zafarlar tilaymiz.
Yangi o‘quv yili muborak bo‘lsin!
Bilim va izlanish yo‘lidagi har bir qadamimiz universitetimiz va Vatanimiz ravnaqiga xizmat qilsin!
Hurmat bilan,
Akmal Allakuliyev
Toshkent Kimyo xalqaro universiteti rektor
