Bugun “Muhandis-D” loyihasining koʻrgazmasi boʻlib oʻtdi

Anʼanaviy tarzda tashkil qilinib kelinayotgan ushbu koʻrgazmada talabalar yil davomida ishlagan loyihalari bilan birga, oʻz qobiliyatlari va ijodkorliklarini namoyish etishdi. Eʼtiborli jihati, talabalar yangi texnologiyalar, mashinalar va tizimlarni loyihalashda ekologik muammolar va jamiyatning ogʻriqli masalalariga yechim berishga intilishgan. Masalan, “LED BIKE VEST” qurilmasining asosiy maqsadi - velosipedda ketayotgan inson ortidan  harakatlanayotgan obyektga ozining harakatini oldindan maʼlum qilish va shu orqali yoʻl harakati xavfsizligini taʼminlashdan iborat. Yana bir “Wire insulation machine” nomli loyiha maqsadi - ushbu qurilma yordamida ijtimoiy hayotimizda yoki sanoatda turli xil ochiq simlarni izolyatsiya qilish jarayonini toʻliq avtomatlashtirib, insonlar yumushini yengillashtirish.  “Peltin Turbina” nomli loyiha esa togʻ va togʻoldi hududlarda yashovchi aholini moʻtadil elektr energiya bilan taʼminlash uchun qulay boʻlgan mikro GES hisoblanadi. Suv miqdori kam boʻlgan, ammo baland togʻ yonbagʻridan oqib keladigan daryo va chashmalar uchun aynan Peltin turbinasi juda mos keladi. Bu turdagi turbinalarni foydali ish koeffitsienti 85% gacha yetadi va qurilma kattaligiga qarab chiqaradigan elektr quvvati 2kW dan 2MW gacha yetadi. Bu texnologiya dunyoga maʼlum boʻlganligi uchun umumiy tannarxi qolgan energiya manbalariga nisbatan arzonroq hisoblanadi. Ushbu qurilma ilmiy maqsadda qilingan boʻlib, talabalarga dars davomida turbinalarning ishlash mexanizmini yoritib berish uchun yasalgan. “Piano hand” loyihasi koʻngilochar loyiha boʻlib, uning maqsadi - datchik va sensorlardan toʻgʻri foydalanish hisoblanadi. Loyiha faqat pianino chalish bilan cheklanib qolmaydi, bu uning asosida sunʼiy protezlarni ham harakatlantirishi mumkin. Loyihalar orasida liderlikni qoʻlga kiritgan “Automatic car parking system” shaharda tirbandlikni oldini olish, avtomobillar uchun xavfsiz hudud, avtomatik boshqaruv, kichik hududda koʻproq mashina joylashtirish kabi qator va yechimlarni taklif qilgan. 
Koʻrgazma yakunida, hakamlar loyihalarni innovatsiyalar, texnik mukammallik, amaliylik va jamiyatga taʼsiri kabi bir qancha mezonlarga koʻra baholadilar. Shuningdek, 1,2,3 oʻrin sohiblariga Toshkent Kimyo xalqaro universiteti tomonidan sertifikat va pul mukofotlari ajratildi.