KIUT grantlarining qariyb 75 foizi qizlar hissasiga to‘g‘ri kelmoqda
Toshkent Kimyo xalqaro universitetida 2021–2026-yillar davomida ajratilgan ta’lim grantlari tahlili e’tiborga molik natijani ko‘rsatdi: grant sohiblari orasida qizlar ulushi yigitlarnikidan qariyb uch baravar yuqori.
So‘nggi besh o‘quv yilida universitetda 1 017 nafar talaba ta’lim grantlari bilan qo‘llab-quvvatlangan. Ularning 74,6 foizini qizlar, 25,4 foizini esa yigitlar tashkil etadi.
Bu ko‘rsatkich grant oluvchilar tarkibida qizlar ulushi gender muvozanatining 50 foizlik darajasidan sezilarli oshganini ko‘rsatadi. Bunday natija xotin-qizlarning oliy ta’limdagi faolligi va akademik yutuqlarini alohida e’tirof etishga asos bo‘ladi.
Qaysi yo‘nalish talabalari yetakchilik qilmoqda?
Tahlillarga ko‘ra, eng ko‘p grant sohiblari Davolash ishi, Boshlang‘ich ta’lim hamda Xalqaro iqtisodiy munosabatlar yo‘nalishlarida tahsil olmoqda. Bu esa grant dasturlarida tibbiyot, pedagogika va iqtisodiyot yo‘nalishlari talabalarining faol ishtirokini ko‘rsatadi.
Yana bir muhim tendensiya — grant oluvchilar sonining izchil ortib borayotganidir. 2021–2022-o‘quv yilida 95 nafar talaba grant bilan taqdirlangan bo‘lsa, 2025–2026-o‘quv yilida ularning soni 299 nafarga yetgan. Besh yil davomida ushbu ko‘rsatkich uch baravardan ziyod oshgan.
Raqamlar shuni ko‘rsatadiki, KIUTda ta’lim grantlari nafaqat iqtidorli yoshlarni rag‘batlantirish vositasi, balki xotin-qizlarning akademik salohiyati va yetakchiligini namoyon etuvchi muhim ko‘rsatkichga ham aylanmoqda.
