KIUT Yaponiya kompaniyalari bilan hamkorlikni kengaytirmoqda
Toshkent Kimyo xalqaro universitetida Yaponiyaning qurilish va muhandislik sohasida faoliyat yurituvchi kompaniyalari vakillari bilan uchrashuv bo‘lib o‘tdi.
Delegatsiya tarkibida “Setsubi Giken” kompaniyasi rahbari Taira Atsushi, “Kirari Densetsu” kompaniyasi prezidenti Kina Masataka, kompaniya vakili Uchima Ryoko hamda “OUKAWAY xususiy bandlik agentligi” direktori Abrorjon Madimarov ishtirok etdi.
Mehmonlarni universitet ta’sischisi Alisher Vahobov hamda infratuzilmani rivojlantirish va iqtisodiy ishlar bo‘yicha prorektor, PhD Sharifbay Badalov kutib oldi.
Uchrashuv davomida KIUT bitiruvchilarini Yaponiyada ish bilan ta’minlash, o‘quv dasturlarini Yaponiya mehnat bozori talablariga moslashtirish va talabalarni yapon tili hamda ish madaniyatiga tayyorlash masalalari muhokama qilindi. Dastlab arxitektura va qurilish, oliy hamshiralik ishi hamda logistika yo‘nalishlarida hamkorlikni yo‘lga qo‘yish rejalashtirilmoqda.
Tashrif doirasida “Arxitektura va shaharsozlik” yo‘nalishi bitiruvchilari bilan suhbatlar ham o‘tkazildi. Natijalarga ko‘ra, munosib nomzodlarni Yaponiya kompaniyalariga ishga qabul qilish ko‘zda tutilgan.
