KIUTda Xitoy xattotligi bo‘yicha mahorat darsi o‘tkazildi
Toshkent Kimyo xalqaro universitetida talabalar an’anaviy mo‘yqalam yordamida xitoy ierogliflarini yozish san’ati bilan yaqindan tanishdilar.
Xitoy xattotligi — shunchaki chiroyli yozish usuli emas. Uning falsafiy asosida insonning ichki xotirjamligi, sabr-toqat, diqqatni jamlash va harakatlar uyg‘unligi yotadi. Har bir chiziq muayyan ma’no va madaniy an’anani ifodalaydi.
Xitoy tilini o‘rganishda xattotlik muhim madaniy ahamiyatga ega. Ierogliflarning tuzilishi, chiziqlar ketma-ketligi va yozilish usullarini o‘zlashtirish talabalar uchun yozuv tizimini chuqurroq tushunish, belgilarni eslab qolish hamda Xitoy madaniyati va tafakkurini yaqindan anglash imkonini beradi.
